Astanada turmystyq gazdy paıdalaný erejelerin buzý jaǵdaılary jıilep ketti - TJD
ASTANA. QazAqparat - Astana qalasy Tótenshe jaǵdaılar departamentiniń qyzmetkerleri turmystyq gazdy tutyný kezinde qaýipsizdik erejelerin saqtaýdyń mańyzdylyǵyn eske salady.
Mamandardyń pikirinshe, qalanyń kóptegen turǵyndary áli kúnge deıin gaz qurylǵylaryn paıdalaný kezinde órt qaýipsizdigi erejelerine nemquraıly qarap keledi. Atap aıtqanda, jyl basynan beri Astana qalasynda gaz quraldaryn paıdalaný kezinde órt qaýipsizdigi erejelerin buzý saldarynan ondaǵan órt oqıǵasy tirkeldi.
«Kez kelgen órt adam densaýlyǵyna qaýipti, biraq gaz ballonynyń nemese gaz qurylǵylarynyń tutanýy jarylys qaýpin týdyrady, al bul adam ólimine alyp kelýi múmkin. Turmystyq qajettilikter úshin qoldanylatyn gaz aýamen aralasa otyryp, jarylǵysh qospa túzedi. Ǵımarat ishine taralǵan gaz jarylýy múmkin, bul úshin sirińke nemese elektr jaryǵyn qosqyshtyń ushqyny sııaqty ot kózi jetkilikti», - deıdi TJD mamandary.
Vedomstvonyń málimetterine sáıkes, búgingi kúni Astanada gaz ballondaryn halyqqa zańsyz satatyn kóptegen jeke tulǵalar bar, olar - gaz ballondaryn arnaıy tehnıkalyq baqylaýsyz jáne órt qaýipsizdigi erejelerin buza otyryp ótkizedi. «Gaz sharýashylyǵyndaǵy qaýipsizdik erejelerine» saı, ballondardy gaz sharýashylyqtary kásiporyndarynyń jumyskerleri aýystyrýǵa tıis. Ballondy almastyrǵan soń gaz kásipornynyń jumyskeri ballonnyń redýktormen qosylǵan jerinde sańylaýdyń joqtyǵyn sabyn emýlsııasymen tekserýge mindetti. Osy rette gaz shyǵatyn jerdi ashyq otpen izdeýge bolmaıdy, bul órtke alyp keledi.
Gaz ballonyn satyp alǵan kezde satyp alýshylar tyǵyzdaǵysh sheńberdiń bar ekenine, dálirek aıtqanda balllon korpýsynda tot basý men deformatsııalaný belgileriniń joqtyǵyn tekserýge tıis.
Gaz qondyrǵylaryn paıdalanǵan kezde tutynýshylar órt qaýipsizdigi erejelerin tekserýge tıis. Sonyń ishinde, gazdyń shyǵýy kezinde ǵımarat ishinde órt nemese jarylys bolý múmkindigin bilýi kerek. Gazdyń shyǵyp jatqanyn ıisinen anyqtaýǵa bolady. Gaz ıisi sezilgen jaǵdaıda gaz plıtasynyń kranyn jaýyp, ballonnyń redýktoryn sheship, ballondy kóshege shyǵarý qajet; úı terezelerin ashyp, jeldetip, mamandardy shaqyrý kerek.
Ot jaǵýǵa, temeki shegýge, elektr quraldaryn, jaryqty qosýǵa ne óshirýge bolmaıdy. Sondaı-aq, gaz ballondary jylytý radıatorynan 1 metrden kem emes qashyqtyqta, peshten 2 metrden kem emes qashyqtyqta ornatý qajet, dep keńes beredi mamandar.
