Astanada turmys zombylyǵyna tap bolǵan áıelderge kómek kórsetiledi
ASTANA. QazAqparat - 6 aı ishinde Astanada zorlyq-zombylyq nemese zorlyq-zombylyq qaýpi saldarynan qıyn jaǵdaıǵa tap bolǵan azamattarǵa arnalǵan daǵdarys ortalyǵynyń kómegine 241 adam júgindi. Olardyń 81-i - áıelder, 160-y - balalar, dep habarlaıdy elorda ákimdiginiń medıa ortalyǵy.
Daǵdarys ortalyǵyndaǵy áıelder men balalar kúnine tórt rettik tamaqtandyrýmen, medıtsınalyq jáne psıhologııalyq kómekpen qamtamasyz etiledi. Mamandar olarǵa, sondaı-aq, qujattardy rásimdeýge, alýǵa járdemdesedi.
Turmystyq zorlyq-zombylyqtan zardap shekken áıelder ortalyqtyń kómegine óz qalaýy boıynsha da, bilim berý, densaýlyq saqtaý, ishki ister organdarynyń baǵyttaýy boıynsha da júginedi.
«Jábir kórgen áıel azamattar ortalyqtyń kómegine kez kelgen ýaqytta óz qalaýymen de, ýchaskelik polıtseıdiń baǵyttaýy boıynsha da júgine alady. Munda turý merzimi 6 aıdy quraıdy. Bári de áıel azamattyń qandaı jaǵdaıǵa tap bolýyna baılanysty», - dep málimdedi áleýmettik jumys mamany Aıym Alpysova.
Qazirgi tańda munda 28 adam bar. Olardyń 9-y - áıelder, qalǵany - balalar. Áleýmettik jumyskerdiń sózderine qaraǵanda, ortalyqtyń kómegine negizinen resmı túrde nekege turmaǵan jáne turaqty jumys orny joq azamatshalar júginedi.
«Negizinen turmystyq jaǵdaıdyń tómendigi, qarajattyń jetispeýi, jubaıynyń alkogoldik ishimdikke, azarttyq oıyndarǵa qumarlyǵy saldarynan otbasylyq janjaldardan keıin áıel azamattar bizge keledi», - deıdi A. Alpysova.
Daǵdarys ortalyǵy málimdegendeı, siz nemese sizderdiń jaqyndaryńyz kómekke zárý bolǵan jaǵdaıda táýlik boıy jumys isteıtin myna telefon boıynsha habarlasýǵa bolady: 49-78-89.
