Astanada «Túrmedegi adamdardyń» sanyn azaıtýdyń 10 sharasy» jobasy Tujyrymdamasy tanystyryldy
ASTANA. 12 jeltoqsan. QazAqparat - Búgin Bas prokýratýrada «Túrmedegi adamdardyń» sanyn azaıtýdyń 10 sharasy» jobasy Tujyrymdamasynyń tusaýkeseri ótkizildi,
dep habarlady atalǵan vedomstvonyń baspasóz qyzmetinen.
Іs-sharanyń uıymdastyrýshylary - Bas prokýratýra, Joǵarǵy Sot, Іshki ister mınıstrligi, «Nur Otan» partııasy janyndaǵy Quqyqtyq keńes, «PRI» Halyqaralyq túrme reformasynyń Orta Azııadaǵy ókildigi jáne EQYU-nyń Astanadaǵy ortalyǵy.
Joba Tujyrymdamasyn talqylaýǵa Joǵarǵy Sottyń tóraǵasy Qaırat Mámı, Qazaqstan Respýblıkasy Prezıdenti janyndaǵy Joǵary Sot Keńesiniń tóraǵasy Bektas Beknazarov, Qazaqstan Respýblıkasy Parlamentiniń depýtattary, sondaı-aq ortalyq memlekettik organdardyń, dıplomatııalyq mıssııa, úkimettik emes uıymdardyń, ǵylymı qoǵamdastyqtyń ókilderi qatysty.
Tusaýkeser barysynda atap kórsetilgendeı, Qazaqstan 90-shy jyldary «túrmedegi adamdardyń» sany boıynsha álemde úshinshi orynda bolsa, búgingi tańda qylmystyq zańnamany izgilendirýdiń jáne raqymshylyqtardyń nátıjesinde bizdiń memleketimiz álem reıtınginde 35-shi bolyp ornalasqan.
Sonymen qatar, Bas Prokýror atap ótkendeı, bas bostandyǵynan aıyrý jazasy áli de basym kúıinde qalyp otyr, sondyqtan da «túrmedegi adamdardyń» sanyn azaıtý úshin qylmystyq jáne qylmystyq atqarý zańnamalaryna túzetý engizý, sondaı-aq praktıkalyq sharalardy ázirleý qajettigi týyndady.
Joba Tujyrymdamasyn talqylaý barysynda qazirgi sátte Parlament Májilisiniń qaraýynda jatqan jańa Qylmystyq kodekstiń jobasy «túrmedegi adamdardyń» sanyn azaıtýǵa qosymsha múmkindikter beretinine nazar aýdaryldy.
Jańa Qylmystyq kodekstiń jobasynda bas bostandyǵynan aıyrý jazalaýdyń balamasyz túri retinde neǵurlym qaýipti qylmystar úshin ǵana saqtalǵan. Shamamen árbir tórtinshi quram boıynsha qylmystyq jazalaý bas bostandyǵynan aıyrýǵa balama sanktsııa engizý jolymen jumsartylǵan. Bostandyǵyn shekteý 60 aýyrlyǵy ortasha jáne 24 aýyr qylmys quramdary boıynsha engiziledi.
Іs-sharany uıymdastyrýshylar azamattardyń quqyqtaryn, qoǵamnyń qaýipsizdigin qamtamasyz etý boıynsha memleket múmkindikteriniń álsireýine jol bermeý úshin keleshektegi izgilendirý boıynsha jumystardy keleńsiz zardaptardy boljaý jáne taldaý negizinde naqtylap júrgizýdi usyndy.
«Túrmedegi adamdardyń» sanyn azaıtýdyń 10 sharasy» jobasy Tujyrymdamasynda qamaýdaǵylardyń sanyn azaıtýdaǵy kedergi bolyp otyrǵan negizgi sebepter belgilengen. Olardyń ishinde - quqyq buzýshylyqtyń aldyn alýdaǵy kemshilikter, qylmystyq jazanyń tym qatańdyǵy, qamaýǵa alýǵa balamaly bultartpaý sharalaryn jetkiliksiz qoldaný, merziminen buryn bosatýdyń keń qoldanylýyna jol bermeıtin kedergiler jáne basqalar.
Osy forýmǵa qatysqan Parlament depýtattary, dıplomatııalyq mıssııa, úkimettik emes uıymdardyń, ǵylymı qoǵamdastyqtyń ókilderi Tujyrymdamany ázirleýshilerdiń damyǵan elderde qoldanylatyn aldyńǵy qatarly standarttar men ınnovatsııalarǵa súıengenin erekshe atap ótip, ondaǵy negizgi ıdeıalardy belsendi túrde qoldady.
Konferentsııanyń qorytyndysymen qarastyrylǵan máseleler boıynsha naqty uıymdastyrýshylyq-quqyqtyq sharalar kesheni ázirlendi, olardyń júzege asýy jaqyn jyldarda bas bostandyǵynan aıyrý oryndaryndaǵy azamattardyń sanyn edáýir azaıtýǵa múmkindik beredi.
