Astanada túrli mamandyq ıelerine jumysqa ornalasýǵa kómek kórsetilýde

ASTANA. QazAqparat - «Jastar» saraıynda kezekti bos jumys oryndary jármeńkesi ótkizildi. Sharaǵa qyzmet kórsetý, bilim, densaýlyq saqtaý, qurylys jáne t.b. salalardaǵy 60 jýyq jumys berýshi qatysty, dep jazady astana.gov.kz.

Jármeńkeniń basty ereksheligi - arnaıy trenıngterdiń ótkizilýi, sharany uıymdastyrýshylar jumys izdeýshilermen suhbattasýdan tabysty ótýdiń qupııalarymen bólisti. Jumyspen qamtý ortalyǵynyń basshysy Oljas Omar birinshi kezekte jastarǵa konsýltatsııalar beriletinin atap ótti. Olarǵa jumysty qalaı izdeý kerek ekendigi, suhbattasýdan ótý, jumys berýshimen áńgimelesý jaǵdaılary túsindiriledi.

«Búgin segizinshi bos jumys oryndary jármeńkesin ótkizip jatyrmyz. Sharaǵa 60-qa jýyq jumys berýshi qatysýda, 300-ge jýyq bos jumys orny usynylady. Kelesi jármeńke 11 tamyz kúni bilim salasyndaǵy bos jumys oryndary jármeńkesi ótkiziledi», - dedi ol.

Jalpy, jyl basynan beri Jumyspen qamtý ortalyǵyna 8 myńǵa jýyq adam habarlasqan. 4 myńǵa jýyq adam turaqty jumyspen qamtyldy, 400 jýyq túlek jastar praktıkasynan ótip jatyr. 600 jýyq adam qaıta daıarlanýda.

«Men plastık terezeler montajdaýshysy bolyp istep júrmin. Biraq bul jumys ózime unamaıdy. Jármeńkege basqa jumys tabý úshin keldim. Keshe Jumyspen qamtý ortalyǵynda bolyp, jármeńke ótkiziletini týraly estidim. Túıindememdi tapsyrdym, endi suhbattasýǵa baramyn», - deıdi qala turǵyny Abzal Erdenbaev.