Astanada Túrkııa elshiligi 2 jyl burynǵy tóńkeris qurbandaryn eske aldy
ASTANA. QazAqparat - Astanada Qazaqstandaǵy Túrkııa Respýblıkasynyń elshiligi 15 shilde kúni Túrkııada atalyp ótetin Demokratııa jáne Ulttyq birlik kúnine oraı shara uıymdastyryp, eki jyl burynǵy tóńkeris qurbandaryn eske aldy, dep habarlaıdy QazAqparat tilshisi.
Qazaqstandaǵy Túrkııa elshiliginde ótken eske alý sharasynda QR Syrtqy ister mınıstrliginiń, Qazaqstanda eńbek etetin túrkııalyq ártúrli saladaǵy uıymdardyń, sheteldik dıplomatııalyq korpýstyń ókilderi men túrkııalyq bıznesmender qatysty. Qurbandardy eske alý qurmetine baılanysty elshilikte arnaıy kórme uıymdastyrylǵan. Ol kórmege dál eki jyl buryn Túrkııada oryn alǵan tóńkeris túnindegi fotosýretter qoıylǵan.
Jıynda sóz alǵan Túrkııanyń Qazaqstandaǵy Tótenshe jáne ókiletti elshisi Nevzat Ýıanyk 2016 jylǵy 15 shildede jasalǵan tóńkeris áreketiniń oryn alǵanyna bıyl eki jyl tolyp otyrǵanyn atap ótti. 2016 jyldyń 15 shildesi kúni Túrkııa óziniń tarıhyndaǵy eń qarańǵy túnderdiń birin bastan ótkergen edi.
«Qandy tóńkeris áreketine tótep bere otyryp, Túrkııanyń egemendigi men demokratııasyn qorǵaý jolynda janyn pıda etken ázız sheıittermiz ben qaısar qaharmandarymyzdy eske alý úshin ekinshi jyl qatarynan jınalyp otyrmyz. Tóńkeris jasamaq bolǵan uıym óziniń qas amal-aılalary jolynda eń áýeli sot mekemelerimiz, Túrik qarýly kúshteri men quqyq qorǵaý organdaryna, sondaı-aq túrli memlekettik mekemelerge jyldar boıy uıashyqtar retinde damyp, memleket qurylymyna enip alǵan edi», - deıdi Túrkııa elshisi.
Elshi óz sózinde lańkestik uıymdarmen kúres qalaı júrip jatqanyn tilge tıek etip, baýyrlas el Qazaqstannyń da kórsetken qoldaýyn atap ótti.
«Osy oqıǵadan keıin elimizge memleket basshysy deńgeıindegi alǵashqy sapardy Qazaqstan Respýblıkasynyń Prezıdenti Nursultan Nazarbaev myrza jasady. Túrik halqy Prezıdent Nursultan Nazarbaev myrzanyń jetekshiligimen dos jáne baýyrlas el Qazaqstannyń kórsetken tilektestigin eshqashan umytpaıdy», - dedi Nevzat Ýıanyk.
