Astanada túrkitildes elderdiń radıo odaǵyn qurý usynyldy
ASTANA. QazAqparat - Astanada ótip jatqan «Azııa medıa dıalogy» forýmyna «Qazaq radıolary» JShS Bas dırektory Mádı Manatbekuly Túrkitildes elderdiń radıo odaǵyn qurýdy usyndy, dep habarlaıdy QazAqparat tilshisi.
«Naqty radıouıym aıasyna biriksek bárimizge de tıimdi bolar edi. Alǵashqy qadam retinde Túrkitildes elderdiń radıo odaǵyn qurýdy usynamyn. Bul barlyǵymyzǵa osy memleketterdegi sońǵy jańalyqtardan, ózgeristerden jáne basqa da medıa trendterden der kezinde habardar bolýǵa múmkindik beredi», - dedi Mádı Manatbekuly Qazmedıa ortalyǵynda ótken kezekti jıynda.
Onyń aıtýynsha, radıonaryqtaǵy jańalyqtardan qalmaý úshin menedjerlerdiń ár jańalyqty baqylap, saraptap otyrýy, tyńdarmannyń qalaýyn dóp basýy jáne olarǵa qajet jańa jobalardy usyna bilýi ózekti bolyp otyr.
«Tájirıbe almasý arqyly mamandarymyzdyń kásibı biliktiligin arttyra alamyz. Ol úshin mamandardyń kásibı biliktiligin únemi trenıng, semınar arqyly arttyryp otyrý kerek. Meniń oıymsha, atalǵan máseleni osy forým aıasynda áriptestik memorandýmdaryna qol qoıý arqyly sheshýge bolady», - dedi radıolar basshysy.
Qazaq radıolarynyń halyqaralyq baılanystaǵy jetistikteri az emes. Búginde «Qazaq radıolary» túrkııalyq «TRT» teleradıo korporatsııasyna qarasty «Túrkııa radıolary» basqarmasymen áriptestik kelisim jasaǵan. Endi jyl saıyn seriktestik qyzmetkerleri Túrkııada aqysyz tájirıbeden óte alady.
«Ortaq kelisim nátıjesinde «Qazaq radıosy» ázirlegen, halqymyzdyń salt-dástúri men án-kúıin nasıhattaıtyn «Túrkistannan tartý» baǵdarlamasy «Túrkııa úni» radıosynyń efırinen shyǵa bastady. Túrkııalyq mamandar qazaq tilinde daıyndap beretin «Anadoly tynysy» habary «Qazaq radıosynyń efırinen berilip júr. Baǵdarlama maqsaty - Túrkııadaǵy qazaqtardyń ómir saltymen, eki memleket arasyndaǵy mádenı is-sharalarmen tanystyrý. Odan bólek, Qyrǵyzstan, Ózbekstan jáne Ázirbaıjanmen birlesken jobalar daıyndaý boıynsha kelissózder júrgizilip jatyr. Munyń barlyǵy - ekijaqty sharalar, al naqty radıouıym aıasyna birigý keler kúnniń enshisinde», - dedi Mádı Manatbekuly.
Aıta keteıik, «Qazaq radıolary» JShS men Vetnamdyq VOV3 mýzykalyq arnasynyń ýaǵdalastyǵy boıynsha, qazaqtyń kúıleri men halyq ánderi Vetnam radıosynda áýeleıdi. Al Qazaq radıosy tyńdarmandarǵa beımálim bolyp kelgen vet halqynyń áýenderin tanystyrady.
