Astanada Túrkistan oblysynyń ónimderi arzan baǵada satylyp jatyr
ASTANA. QazAqparat - Elordadaǵy «Qazaqstan» sport kesheni aýmaǵynda Túrkistan oblysynyń kezekti aýyl sharýashylyq jármeńkesi ótip jatyr, dep habarlaıdy QazAqparat tilshisi.
Bıyl Astanadaǵy Túrkistan oblysynyń jármeńkesi osymen úshinshi ret uıymdastyrylyp jatyr.
«Astana qalasynyń 20 jyldyq merekesi aıasynda elordada Túrkistan oblysynyń 5 jármeńkesin ótkizý josparlanǵan. Sebebi, bizdiń oblys basqa óńirlerge qaraǵanda, aýyl sharýashylyǵyn damytýǵa asa qolaıly. Maqta sharýashylyǵy 100% Túrkistan oblysynda júrgiziledi, júzim sharýashylyǵyndaǵy oblys úlesi - 72%, baý-baqshada - 60%. Al 1325 gektar bolatyn jylyjaılarymyz - respýblıka jylyjaılarynyń 80% quraıdy», - deıdi Túrkistan oblysy aýyl sharýashylyǵy basqarmasy basshysynyń orynbasary Nurjigit Myrzahmetov.
Túrkistandyq óndirýshiler kezekti jármeńkege 101 mln teńge bolatyn 411 tonna aýylsharýashylyǵy ónimderin ákeldi. Onyń ishinde 66 tonna et jáne et ónimderi, 137 tonna kókónis, 27 tonna sút ónimderi, 39 tonna jemis-jıdek, 5 tonna balyq syndy 35-ten astam aýyl sharýashylyǵy ónimderi bar.
«Túrkistan oblysynyń Saıram aýdany óziniń kókónis jáne kartop ónimderimen tanymal. Sondaı-aq, Saıram aýdanynda qaıta óńdeý salasy jaqsy damyǵan. Astanaǵa qaıta óńdelgen irimshik, qaımaq, shujyq syndy sút, et ónimderin ákelip otyrmyz. Jergilikti taýar óndirýshilerdi Astanaǵa jetý úshin avtokóliktermen qamtamasyz ettik, sondyqtan, taýar óndirýshiler artyq shyǵyndalmaıdy. Arada deldal joq. Sáıkesinshe, barlyq ónimderimiz tıimdi baǵada satylýda», - deıdi Túrkistan oblysy Saıram aýdandyq aýyl sharýashylyq bóliminiń basshysy Nurpapa Kópeev. 
Uıymdastyrýshylardyń aıtýynsha, qyrkúıek jáne qazan aılarynda Astanada Túrkistan oblysynyń jármeńkeleri ótedi.
Jalpy, Astanada uıymdastyrylatyn bes jármeńkede túrkistandyq sharýalar elordaǵa 15 myń tonnaǵa deıin aýyl sharýashylyǵy ónimderin jetkizedi.
