Astanada túrki oıshyldary ıAsaýı men Balasaǵunǵa arnalǵan jıyn ótti
ASTANA. QazAqparat - Túrki akademııasy halyqaralyq uıymy (TWESCO) Astana qalasynda, «Eurasian Book Fair - 2016» Eýrazııalyq halyqaralyq kitap kórmesi aıasynda «Túrki áleminiń tuǵyrly tulǵalary: Qoja Ahmet ıAsaýı jáne Júsip Balasaǵun» atty keleli jıyn ótkizdi, dep habarlaıdy Túrki akademııasy Halyqaralyq uıymynyń baspasóz qyzmetine silteme jasap.
Uly oıshyl Júsip Balasaǵunnyń bıylǵy 1000 jyldyǵy men ǵulama shaıyr Qoja Ahmet ıAsaýıdiń ómirden oǵanyna 850 jyl tolýyna oraı uıymdastyrylǵan jıyndy Akademııa basshysy Darhan Qydyráli júrgizip otyrdy. Ol óziniń alǵy sózinde ıÝNESKO sheńberinde atalyp jatqan osy mereıli datalardyń mańyzyna toqtaldy. Halyqaralyq uıymnyń uıytqy bolýymen jáne jalpy túrki dúnıesinde uly oıshyldarǵa arnalyp kóptegen aıtýly is-sharalar uıymdastyrylǵanyn atap ótti.
Budan keıin kórnekti qoǵam qaıratkeri Mekemtas Myrzahmetuly, QR UǴA akademıgi Ǵarıfolla Esim, Q.A.ıAsaýı atyndaǵy Halyqaralyq qazaq-túrik ýnıversıtetiniń prorektory Mustafa Eren men ıasaýıtanýshy-ǵalym Dosaı Kenjetaıuly tuǵyrly qos tulǵanyń taǵylymy jaıly arnaıy baıandamalar jasady. ıAsaýı men Balasaǵunnyń shyǵarmashylyq muralarynyń álemdik órkenıetke yqpaly jáne zerttelý tarıhy jaıly paıymdy oılarymen bólisti.
Alqaly basqosýǵa Týrkııa Respýblıkasynyń Qazaqstandaǵy Tótenshe jáne ókiletti elshisi Nevzat Ýıanyk, Túrki keńesi bas hatshysynyń orynbasary Abzal Saparbekuly, Memlekettik tarıh ınstıtýtynyń dırektory Búrkitbaı Aıaǵan, Qazaqstannyń Ulttyq akademııalyq kitaphanasynyń dırektory Úmithan Muńalbaeva, Astana qalasynyń Bas ımamy Naýryzbaı Taǵanuly, sondaı-aq Joǵary oqý oryndary basshylary men alys jáne jaqyn shet elderden kelgen kórnekti ǵalymdar, zııaly qaýym ókilderi qatysty.
Sonymen qatar, sharaǵa arnaıy qatysqan Túrki Keńesi aqsaqaldar keńesiniń múshesi Ádil Ahmetov, akademık Bolat Kómekov, QR Din isteri jáne azamattyq qoǵam mınıstrligi Din máseleleri jónindegi ǵylymı-zertteý jáne taldaý ortalyǵynyń dırektory Aınur Ábdirasylqyzy jáne R.B.Sýleımenov atyndaǵy Shyǵystaný ınstıtýtynyń aǵa ǵylymı qyzmetkeri Ǵalııa Qambarbekova da jıyn barysynda sóz alyp, oıshyldardyń ómiri men asyl muralarynyń búgingi ózektiligi jaıly oı-tolǵamdaryn ortaǵa saldy.
Aıta ketý kerek, bul Akademııanyń túrki dúnıesiniń tuǵyrly tulǵalaryna arnaǵan alǵashqy jıyny emes. Buǵan deıin Túrkııa astanasy Ankarada, Qyrǵyzstan astanasy Bishkekte, Ystambul qalasynda, Astanada túrki álemindegi belgili uıymdarmen birlese otyryp, osyndaı birqatar aıtýly is-sharalardyń ótkizilýine atsalysqan bolatyn. Sonymen birge, TWESCO Júsip Balasaǵunnyń «Qutty bilik» dastanynyń qaıta tolyqtyrylǵan nusqasy men Qoja Ahmet ıAsaýıdiń «Dıýanı hıkmetin» parsy tilinen aýdaryp, kitap etip jarııalady.
