Astanada túrki mýzykasynyń «Astana-Arqaý» festıvali ótýde (FOTO)
ASTANA. QazAqparat - Búgin Astana kúni aıasynda «Astana Opera» teatrynyń kameralyq zalynda «Astana-Arqaý» túrki mýzykasy festıvaliniń saltanatty ashylýy ótti. Shara 7 jyl qatarynan ótkizilip keledi, dep habarlady astana.gov.kz.
Túrki halyqtarynyń áýezdi mýzykasy eshkimdi beıjaı qaldyrmaı, tyńdarmandardyń dý qol shapalaǵy men ystyq yqylasyna ıe boldy.
Festıval áýel bastan túrki mýzykasynyń áralýandylyǵy men qazirgi zamanǵy túrki etnomýzykasyndaǵy jaqyndyqty izdeýge baǵyttalǵan bolatyn.
«Astana-Arqaý» dástúrli túrki mýzykasy festıvali - túrki halyqtarynyń kóp janrly mýzykalyq murasyna arnalǵan mádenı shara. Festıvalǵa túrli túrki halyqtarynyń dástúrli oryndaýshylary qatysady. Olardyń sheberliginiń arqasynda elordalyq kórermen dástúrmen tanysyp, ártúrli sırek kezdesetin mýzykalyq aspap túrlerin kóre alady. Osy jyldar ishinde festıvalǵa barlyq túrki halyqtarynan 470-ten astam mýzykant pen ǵalym qatysty.
Bıylǵy festıvalǵa keıbir túrki halyqtarynyń ókilderi birinshi ret qatysýda. Mysaly, soltústiktegi sany az túrki halqy - dolǵandar. Qazirgi kezde taımyrlyq túrki-dolǵandar sany 5000 adamnan aspaıdy.
Budan bólek, sırek kezdesetin aspaptar festıvalǵa Túrkimenstannan arnaıy ákelindi. «Astana-Arqaý» festıvali 6 shildege deıin jalǵasady. Erteń saǵat 18:00-de sharaǵa qatysýshy ártister «Han Shatyr» SOO qasyndaǵy «Myńjyldyqtar toǵysyndaǵy Astana» jobasynyń alańynda óner kórsetedi. Festıvaldiń saltanatty jabylýy 6 shilde kúni saǵat 16:00-da «Astana Opera» teatrynyń kameralyq zalynda ótedi.
