Astanada «Túrki barometri» jobasy tanystyryldy
«Túrki barometri» óziniń sıpaty jaǵynan Eýropa odaǵynyń «Eýropa barometri» zertteý baǵdarlamasy men álemniń ózge de aımaqtarynda júrgiziletin («Afrobarometr», «Latynbarometr» t.b.) zertteýlerine uqsas. Mundaǵy maqsat - túrki memleketteri turǵyndarynyń Túrki keńesi tarapynan júrgiziletin ıntegratsııalyq protsesterge qatysty kózqarastaryn, ekonomıkalyq, mádenı aspektilerge baılanysty oı-pikirlerin baǵamdaý.
Alǵashqy áleýmettik zertteý Qazaqstan, Túrkııa, Ázerbaıjan, Qyrǵyzstan, Ózbekstan jáne Túrkmenstan astanalarynyń turǵyndary arasynda júrgizilgen. Onda ár memleketten 500 respondent iriktelip alynyp, olarǵa «Túrki elderiniń mádenıetimen qanshalyqty tanyssyz?», «Túrki álemindegi bedeldi tulǵa kim dep oılaısyz?», «Túrki áleminiń ǵylym, mádenıet, sport salalaryndaǵy tanymal ókilderin atańyz» sekildi 50-den astam suraq qoıylǵan.
«Saýalnamaǵa Túrkimenstannyń qatysqanyna erekshe rızashylyq bildiremiz. Ózbekstandyqtar da zertteý jobasyna belsene qatysty. Bul Túrki akademııasynyń bir qadam alǵa jyljyǵanyn kórsetedi. Bolashaqta saýalnamanyń aıasyn keńeıte túsemiz. Alǵashqy zertteýge el astanalarynan 500 adam qatyssa, keler jyly óńirlerden 1000 respondentti qamtýdy josparlap otyrmyz. Saýalnamada elýden astam suraq qoıyldy. Aldaǵy ýaqytta barlyq suraqtar júıelenip, naqty analız jasalyp, nazarlaryńyzǵa usynylady. Bul Túrki keńesiniń jumysyna, túrki memleketteriniń yntymaqtastyǵyna óz septigin tıgizedi», - dedi Túrik akademııasy halyqaralyq uıymynyń basshysy Darhan Qydyráli Astanada ótken «Túrki áleminde rýhanı jańǵyrý: Tarıh. Tanym. Tulǵa» taqyrybyndaǵy konferentsııada.
Sonymen birge, Darhan Qydyráli «Túrki barometri» zertteýiniń budan bylaı táýelsiz túrki memleketterinde alty aı saıyn júrgizilip turatynyn málimdedi. Oǵan jasy 18-ge tolǵan azamattar qatysa alady.
