Astanada Túrki álemi Ǵylym akademııalary odaǵy quryldy
ASTANA. QazAqparat - Búgin Astanada Túrki álemi Ǵylym akademııalary odaǵy quryldy jáne onyń alǵashqy quryltaı jıyny ótti.
Quryltaı jumysyna qatysqan Ázerbaıjan, Qazaqstan, Qyrǵyzstan, Túrkııa, Tatarstan, Bashqurtstan ulttyq akademııalarynyń basshylary Túrki álemi Ǵylym akademııalary odaǵyn qurý týraly bas qujatqa qol qoıdy.
Halyqaralyq Túrki akademııasynyń uıymdastyrýymen ótken basqosýda Odaqtyń jumysyn retteıtin ereje bekitilip, onyń tóraǵasy saılandy jáne kelesi jıyn ótetin oryn anyqtalyp, alǵashqy hattamaǵa qol qoıyldy.
«Bizdiń babalarymyz burynǵy zamandardan beri túrki halyqtarynyń birligin ansaǵan. Osy birliktiń birinshi qadamy ǵylym salasynan bastalyp, resmı túrde qazir ǵana qol qoıyldy, - deıdi Qazaqstannyń Ulttyq ǵylym akademııasynyń tóraǵasy Murat Jurynov. - Túrki dúnıesinde 240 mıllıonǵa jýyq túrki halyqtary turady. Túrki mádenıeti moıyndalýy kerek. Osy turǵyda birlese otyryp, barlyq elderdiń ǵalymdary ǵylymı-zertteý jumystarymen shuǵyldansa, túrki álemine enetin elderdiń damýyna úlken septigin tıgizedi».
Aıta ketý kerek, Túrki keńesine múshe memleketter basshylarynyń 2012 jylǵy 23 tamyzda Bishkekte ótken II sammıtiniń deklaratsııasynda ǵylym men bilim salasyndaǵy keń aýqymdy yntymaqtastyqty damytýǵa aıyryqsha nazar aýdarylǵan bolatyn. Osyǵan oraı, 2014 jylǵy 28 qarashada Bakýde ótken Túrki keńesine múshe memleketter Bilim mınıstrleriniń III kezdesýinde Halyqaralyq Túrki akademııasyna Túrki álemi Ǵylym akademııalary odaǵyn qurý jóninde ókilettilik berilgen.
Odaqtyń jumysyn qamtamasyz etetin hatshylyq Halyqaralyq Túrki akademııasynda ornalasady.
