Astanada Túrki memleketteri uıymynyń Jastar isi jáne sport mınıstrleriniń 8-otyrysy ótti
ASTANA. KAZINFORM - Elordada Túrki memleketteri uıymynyń Jastar jáne sport máselelerine jaýapty mınıstrleriniń 8-shi otyrysy ótti.
QR Týrızm jáne sport mınıstrliginiń baspasóz qyzmeti málim etkendeı, atalǵan is-sharaǵa Týrızm jáne sport mınıstri Erbol Myrzabosynov, Túrki memleketteri uıymynyń Bas hatshysy Kýbanychbek Omýralıev, Majarstannyń Almaty qalasyndaǵy Bas konsýly Sabolch Karoı Seke, sonymen qatar Ázerbaıjan, Qyrǵyzstan, Túrkııa, Ózbekstan, Túrikmenstannyń salaǵa jaýapty mınıstrleri men ókilder jáne Dúnıejúzilik etnosport konfederatsııa prezıdenti Bilál Erdoǵan qatysty.
Jastar men sport máselelerine jaýapty vedomstvo basshylarynyń dástúrli kezdesýinde sport salasyndaǵy yntymaqtastyqty odan ári nyǵaıtýǵa, sondaı-aq jastar saıasaty men sport salasyndaǵy jańa jobalardy daıyndaýǵa negiz bolatyn pikirler men tájirıbelerin ortaǵa saldy.
Týrızm jáne sport mınıstri Erbol Myrzabosynov Qazaqstan Túrki Memleketteri uıymy sheńberinde jan-jaqty ózara is-qımyldy damytýǵa erekshe mán beretinin, uıymnyń keńistigindegi yntymaqtastyqty odan ári nyǵaıtý jáne tereńdetý maqsatynda biz túrki halyqtaryn jaqyndastyrýǵa baǵyttalǵan bastamalardy jan-jaqty qoldaıtynyn jetkizdi.
«Bizde sporttyq áleýetti kúsheıtý úshin kóptegen jańa múmkindik bar. Sońǵy jyldary sportshylarymyz halyqaralyq arenada joǵary nátıjelerge qol jetkizdi. Bul rette qazaqstandyq sportshylar uıymǵa múshe jáne baqylaýshy memleketter aýmaǵyndaǵy halyqaralyq sporttyq jarystarǵa belsendi qatysady. Memleketterimiz arasyndaǵy sporttyq baılanystardy nyǵaıtý bolashaq urpaq úshin tabys kepili jáne shabyt bolatynyna senimdimin. Jastar sportyn damytýǵa erekshe mán berý qajet. Jastar – árbir memlekettiń basty aktıvi jáne bizdiń maqsatymyz olardyń úılesimdi damýy úshin barlyq jaǵdaı jasaý», - dedi mınıstr.
Sonymen qatar Erbol Myrzabosynov TMU keńistiginde TAN birlesken jobasyn júzege asyrýdy usyndy. Bul bastama shtab-páteri Almaty qalasynda ornalasatyn Túrki marafondary alıansy aıasynda Túrki halyqtary marafondarynyń serııasyn biriktirýge baǵyttalǵan.
«Biz 6 eldegi 7 marafondy, atap aıtqanda, Almaty, Túrkistan, Baký, Samarqand, Ystambul, Býdapeshttegi marafondardy, sondaı-aq Snow Leopard Run biryńǵaı alıansqa birigýge shaqyramyz. Onda sheshimder qabyldaý úshin osy marafondardyń ókilderi teń ókildik etedi», - dedi Týrızm jáne sport mınıstri.
Atalǵan bastama júgirýshilerdiń ishki kóshi-qony jáne halyqaralyq qatysýshylardy tartý esebinen týrıster aǵynyn ulǵaıtýǵa, marafondar arasyndaǵy úzdik tájirıbelermen almasýǵa, álemdik standarttarǵa sáıkes jarystardy uıymdastyrý sapasyn arttyrýǵa jáne basqa da birqatar mańyzdy artyqshylyqtarǵa ıe bolady.
Jıyn sońynda Erbol Myrzabosynov kezdesýge jáne 5-shi Dúnıejúzilik kóshpendiler oıyndaryna qatysqany úshin alǵys bildirdi.
