Astanada Túrki memleketteri uıymyna múshe elderdiń sammıti ótedi
Qarashada Qazaqstannyń tóraǵalyq etýimen Túrki memleketteri uıymyna múshe elder basshylarynyń qatysýymen 10-shy mereıtoılyq sammıt ótedi. Bul týraly QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erkin Tuqymov málim etti, dep habarlaıdy QazAqparat tilshisi.
«Búgin bizdiń ınstıtýt Túrki memleketteri uıymynyń zertteý ortalyqtarynyń otyrysyn ótkizip jatyr. Bıyl 3 qarashada Astanada Qazaqstannyń tóraǵalyq etýimen Túrki memleketteri uıymyna múshe elder basshylarynyń qatysýymen 10-shy mereıtoılyq sammıt ótedi. Osyǵan oraı qalyptasqan dástúr boıynsha sarapshylar sammıt aldynda jınalyp otyr. Aıtylǵan negizgi oılar men usynymdar memleket basshylyǵyna usynys retinde joldanady» - dedi Erkin Tuqymov elordada ótip jatqan túrki memleketteri uıymyna múshe elderdiń ókilderimen kezdesýde.
Sondaı-aq, ınstıtýt basshysy Túrki memleketteri uıymy elderiniń ózara árekettesýine toqtaldy.
«Túrki keńesiniń Túrki memleketteri uıymyna aınalýy yntymaqtastyǵymyzdyń tereńdeı túskenin kórsetti. Bul elderimizdiń birlesken tarıhyndaǵy jańa belesti belgiledi. Biz aldymyzǵa ekonomıkalyq yntymaqtastyqty tereńdetýge jáne kóliktik ózara baılanysty damytýǵa baǵyttalǵan strategııalyq maqsattar qoıyp otyrmyz», - deıdi ol.
