Astanada túrki áleminiń rýhyn arqaý etken «Qypshaq qyzy Appaq» operasynyń premerasy ótti
ASTANA. KAZINFORM — Astanada Mádenıet jáne óner qyzmetkerleri kúnine oraı kórermen kópten kútken «Qypshaq qyzy Appaq» operasynyń premerasy ótti. Soǵys pen saıası tartystar aıasyndaǵy danalyq pen beıbitshilikke jol salǵan uly mahabbatty sıpattaıtyn bul týyndy otandyq mádenıet ómirindegi eleýli oqıǵaǵa aınaldy.
Qoıylym opera lıbrettosynyń negizinde Ázerbaıjannyń uly aqyny Nızamı Gánjaýı men onyń mýzasyna aınalǵan qypshaq qyzy Appaqtyń mahabbat hıkaıasy jatyr. Ańyz boıynsha, Appaqty Nızamıge Derbent ámirshisi baǵaly syı retinde tartý etken. Ýaqyt óte kele eki jas bir-birine shynaıy ǵashyq bolady. Shyǵarmada tek mahabbat hıkaıasy emes, tarıhı birlik pen túrki halyqtarynyń bostandyqty ańsaǵan rýhy keń kórinis tapqan.
Kompozıtor Serikjan Ábdinurov bul aýqymdy týyndynyń jazylý tarıhy men onyń arqalaǵan júgine toqtalyp ótti.
— Bul opera biz úshin óte jaýapty ári kúrdeli joba. Biz bul shyǵarmany 2010 jyly jaza bastadyq, oǵan ulttyq mýzykanyń alyby Erkeǵalı Rahmadıev sebepker bolyp edi, sol kisiniń amanaty. Operanyń basty maqsaty — týysqan, tarıhy bir túrki halyqtarynyń salt-dástúrin, dostyǵyn, beıbitshilik súıgish rýhyn kórsetý. Appaq beınesi arqyly biz túrki qyzdaryna tán ortaq qasıetterdi — ınabattylyqty, mahabbatqa adaldyqty, óz otanyna degen súıispenshilik pen el úshin jan berýge daıyn erlikti kórsetkimiz keldi, — dedi kompozıtor.
Qoıylymnyń mýzykalyq jetekshisi, Qazaqstannyń halyq ártisi Abzal Muhıtdın operany zamanaýı mýzyka mádenıetindegi sırek qubylys dep baǵalady. Onyń aıtýynsha, qoıylymnyń kólemi men kúrdeliligin Verdıdiń «Aıdasymen» salystyrýǵa bolady.
— Bul — toǵyz kartınadan turatyn úlken shyǵarma. Týyndynyń vokaldyq júktemesi de kúrdeli, óıtkeni operada eń tómen jáne eń joǵary notalar kezdesedi. Appaq pen Nızamıdiń tebirenisin jetkizý úshin qazaqtyń dombyrasy men ázerbaıjannyń tar aspabynyń tembrlerin qoldandyq, olar bir-birimen keremet úılesim tapty, — dedi maman.
Appaq beınesin somdaıtyn Bıbigúl Januzaq bul róldi óz shyǵarmashylyq jolyndaǵy eń kúrdeli ári jaýapty beınelerdiń biri dep atady.
— Appaq — ákesiniń erke qyzy. Onyń bir sátte Nızamıdiń jaryna aınalǵanyn kórermenge shynaıy jetkizý óte qıyn. Biz at ústinde qylyshtasyp júrip án oryndaıtyn sahnalarǵa daıyndaldyq. Bul tek daýysqa emes, dene koordınatsııasyna túsetin úlken júkteme. Mýzyka da óte joǵary tessıtýrada jazylǵan, sondyqtan ár partııa asa nazar salý kerek, — dedi solıst.
Ulttyq jobanyń joǵary deńgeıde sahnalanýyna Mádenıet jáne aqparat mınıstrligi de úlken qoldaý kórsetken. Qoıylymnyń vızýaldyq sheshimi kórermen nazaryn aýdaratyny haq. Spektaklge arnap 576 kostıým tigilgen jáne 1000-ǵa jýyq rekvızıt daıyndalǵan.
Aıta keteıik, buǵan deıin, Memleket basshysy mádenıet jáne óner qyzmetkerlerin marapattaǵan edi.
Darııa Ǵumar
