Astanada Túrki áleminiń balalar oıyndary halyqaralyq festıvali ótip jatyr
ASTANA. KAZINFORM – 16-18 aqpan aralyǵynda elordadaǵy №104 mektepte 9-13 jas aralyǵyndaǵy oqýshylarǵa arnalǵan «Túrki áleminiń balalar oıyndary halyqaralyq festıvali» ótip jatyr.
Іs-sharany Qazaqstan Respýblıkasy Oqý-aǵartý mınıstrligi men Túrkııa Respýblıkasynyń Bilim mınıstrligi birlesip uıymdastyrdy.
Festıvaldiń basty maqsaty – túrki memleketteri arasyndaǵy mádenı yntymaqtastyqty nyǵaıtý, dástúrli balalar oıyndaryn saqtaý jáne ony jas urpaqqa keńinen nasıhattaý. Sonymen qatar balalar oıyndaryn júıeleý, ortaq muraǵat qalyptastyrý, oıyndardyń bilim berý úderisindegi pedagogıkalyq mańyzyn arttyrý kózdelgen. Uıymdastyrýshylar bul bastama jas býynnyń áleýmettik, emotsııalyq jáne mádenı damýyna oń yqpal etedi dep atap otyr.
Festıval aıasynda elimizdiń 20 óńirinen kelgen pedagogterge arnalǵan halyqaralyq semınar-trenıng uıymdastyrylǵan. Qatysýshylar túrki halyqtarynyń dástúrli oıyndarymen tanysyp, olardy oqý úderisine engizý tetikterin talqylaýda. Baǵdarlamada asyq atý, taıaq tartý, láńgi tebý, oramal tastamaq, saqına salý, hantalapaı, tymaq urý, bes asyq jáne ózge de ulttyq oıyn túrleri qamtylǵan.
Semınar-trenıng qorytyndysy boıynsha Túrkııa delegatsııasy qazaq mádenıetine tán tórt oıyndy iriktep alady. Bul oıyndar 2026 jylǵy sáýir aıynda Stambýl qalasynda ótetin túrki elderiniń festıvalinde tanystyrylady.
Festıval túrki áleminiń ortaq mádenı murasyn saqtaýǵa jáne halyqaralyq pedagogıkalyq yntymaqtastyqty damytýǵa baǵyttalǵan.
Aıta keteıik, buǵan deıin balalarǵa arnalǵan ulttyq oıyndardyń túrlerin jazǵan bolatynbyz.