Astanada týrızmdi damytý úshin ınfraqurylymdy keńeıtý qajet – sarapshylar pikiri
ASTANA.KAZINFORM – Astananyń týrısterdi qabyldaý múmkindigi qanshalyqty joǵary jáne týrızm salasyn odan ári damytý úshin qalada qandaı nysandar qajet? Bul máseleler AIMAQ podkastynyń jańa shyǵarylymynda talqylandy.
Іshki týrızmmen aınalysatyn Skyway týroperatorynyń jetekshisi Ásem Qozbaǵarovanyń aıtýynsha, búginde Astanada kóp adamdy qabyldaýǵa múmkindik beretin alańdar bar. Alaıda iri uıymdastyrýshylardy tartý jáne halyqaralyq is-sharalar sanyn arttyrý úshin qosymsha oryndar qajet.
– Meniń oıymsha, qalada aýqymdy kontsertter men kórmeler ótkizýge arnalǵan úlken zaldar men arnaıy keńistikter qajet. Mundaı nysandar joǵary deńgeıdegi, aýqymdy is-sharalardy uıymdastyrýǵa múmkindik beredi. Bul óz kezeginde álemdik deńgeıdegi uıymdastyrýshylardyń Astanaǵa degen qyzyǵýshylyǵyn arttyrady, – dedi Ásem Qozbaǵarova.
Sonymen qatar qalanyń múmkindikterin qajetti ınfraqurylym qurýmen ǵana shektemeı, ony kásibı ortaǵa keńinen tanystyrý da mańyzdy.
Týrıstik ınfraqurylymdy keńeıtý qajettigin ««Astana Tourism» týrızmdi damytý ortalyǵynyń týrıstik baǵyttar men qyzmetterdi damytý departamentiniń dırektory Olga Abeldınova da atap ótti. Onyń aıtýynsha, týrısterdi kóbirek qabyldaý úshin qalada qonaqúıler salýdy jalǵastyryp, jańa týrıstik nysandar ashý qajet.
Sonymen birge elordada saıahatshylardyń jaıly demalýyna qajetti jaǵdaılar qalyptasqan. Qalada halyqaralyq qonaqúı jelileri jumys isteıdi, qoǵamdyq tamaqtaný oryndarynyń ınfraqurylymy damyǵan. Sondaı-aq Astanadaǵy birqatar meıramhana halyqaralyq reıtıngilerge engen.
– Jyl saıyn qalada jańa týrıstik nysandar ashylyp jatqanyn kórip otyrmyz. Bıyl Qazaqstan temir joly mýzeıi, Alem.ai mýzeıi jáne Lumire-Hall keńistigi ashyldy. Aldaǵy jyldary Astanada týrıster tamashalaıtyn qyzyqty oryndar sany arta túsedi dep oılaımyn, – dedi Olga Abeldınova.
Týrıstik ortanyń barshaǵa qoljetimdi bolýyna da erekshe kóńil bólinip otyr. Byltyr Astana qoljetimdi týrızmdi damytý jónindegi Eýropalyq halyqaralyq ENAT qaýymdastyǵyna múshe boldy. Budan bólek, qalada erekshe qajettiligi bar adamdarǵa arnalǵan bes ınklıýzıvti týrıstik marshrýt ázirlendi.
Saıahatshylarǵa arnalǵan CityPass kartasy da bar. Onyń kómegimen týrıster qalanyń 12 týrıstik nysanyn jeńildikpen aralaı alady. Taǵy bir mańyzdy baǵyt bilikti mamandar daıarlaý. Qazaqstan men Qytaı jyly aıasynda qytaı tilin meńgergen 25 gıd oqytyldy.
Sonymen qatar jeke kóligi bar 32 jeke gıd daıyndaldy. Olar týrısterdi áýejaıdan kútip alyp, qonaqúılerge, meıramhanalarǵa jáne qalanyń kórikti jerlerine deıin alyp bara alady.
Bıyl halyqaralyq deńgeıdegi mamandar daıarlaý jumysy da jalǵasyp jatyr. Atap aıtqanda, Dúnıejúzilik týrıstik gıdter qaýymdastyqtary federatsııasynyń (WFTGA) halyqaralyq standarttaryna sáıkes bolashaqta jańa mamandardy oqyta alatyn 12 ulttyq trener daıarlanyp jatyr.
Aıta keteıik, ishki týrızm 84,4% ósti.
