Astanada týrızm salasynda 10 mlrd. teńgege qyzmet kórsetilgen
ASTANA. QazAqparat - Astanada týrıstik aǵym kórsetkishi jyldan-jylǵa artyp, sońǵy 16 jyl ishinde elimizdegi iri týrıstik ortalyqqa aınaldy. 2013 jyly Astanaǵa 500 myńǵa jýyq týrıst kelse, sonyń 80 myńy sheteldikter. Bul salada kórsetilgen qyzmet quny 9 531 229 800 teńgeni quraǵan. Bul týraly Astana qalasy ákiminiń apparaty baspasóz qyzmetine Týrızm, dene shynyqtyrý jáne sport basqarmasynan habarlady.
Elordadaǵy týrızmniń turaqty damýyn qala qonaq úılerindegi oryndardyń árdaıym toly bolýynan ańǵarýǵa bolady. Qalanyń qonaq úı qoryn arttyrý jumystary udaıy jalǵasýda. Qazirgi kezde Astanada 9013 orynǵa arnalǵan 6 659 nómirden turatyn 163 qonaq úı jumys isteıdi. Bir nómirdiń ortasha quny 15 500 teńgeniń kóleminde. Qonaq úı qyzmeti salasynda 3 654 adam jumyspen qamtylǵan, olardyń 65 % er adamdar, 35% áıelder.
Týrızmniń damý qarqynynyń oń bolýy osy salada jumys isteıtin memlekettik mekeme men uıymdardyń birlese atqarǵan jumys nátıjesinde múmkin bolyp otyr. Búginde Astanada 232 týrıstik fırma qyzmet kórsetse, sonyń 7-iniń qyzmeti ishki týrızmge baǵyttalǵan. Bul baǵytta 761 adam qyzmet jasaıdy.
Іskerlik týrızm salanyń kirisi mol túrleriniń biri. Sheteldik týrısterdiń 77,9%-y Astana qalasyna iskerlik maqsatta, ıaǵnı túrli kórmeler, konferetsııalar men semınarlarǵa qatysý úshin kelgender.
Halyqaralyq mamandandyrylǵan EKSPO-2017 kórmesin ótkizý boıynsha daıyndyqty esepke ala otyryp, Astana qalasynyń týrıstik múmkindikterin damytýǵa baǵyttalǵan túrli jobalar, sonyń ishinde «Welcome to Astana» jobasy júzege asyrylýda. Jobanyń negizgi maqsaty týrızm jáne qyzmet salasynyń jumysshylaryn oqytý, qaıta oqytý jáne olardyń biliktiligin arttyrý arqyly kórsetiletin qyzmet deńgeıin kóterý, sondaı-aq kórmede jumys isteý úshin eriktilerdi daıarlaý.
