Astanada týrıstik ortalyqtarǵa kúnine 20-ǵa jýyq adam júginedi
ASTANA. KAZINFORM – Elordada týrısterdiń qaýipsizdigin qamtamasyz etý jáne olardy aqparattandyrý jumystary júıeli túrde júrgizilip jatyr.
Qala ákimdiginiń málimetinshe, «Zań men tártip» qaǵıdaty aıasynda týrıstik polıtsııa men «Astana Tourism» ortalyǵy birlesip jumys isteýde. Týrısterge arnalǵan arnaıy jadynamalar ázirlenip, olar Nurjol býlvaryndaǵy «Báıterek» monýmentinde jáne Qabanbaı batyr dańǵylyndaǵy Nursultan Nazarbaev halyqaralyq áýejaıynyń halyqaralyq termınalyndaǵy aqparattyq ortalyqtarda usynylady.
– Biz arnaıy jadynamalar daıyndadyq. Olardy «Báıterek» monýmentindegi jáne áýejaıdaǵy týrıstik aqparattyq ortalyqtardan alýǵa bolady. Aqparattyq ortalyqtarda kelýshilerge elorda týraly qajetti málimet berilip, olardyń baǵyt-baǵdar alýyna kómektesemiz. Mamandar úsh tilde qyzmet kórsetedi. Áýejaıdaǵy ortalyq táýlik boıy jumys isteıdi, al «Báıterek» ishindegi ortalyq kún saıyn saǵat 10:00-den 21:00-ge deıin ashyq. Qazir ortalyqtarǵa kúnine shamamen 15–20 týrıst júginedi. Olar kóbine qalanyń kórikti jerleri, baǵyttar men kólik qatynasy týraly suraıdy. Jaz mezgilinde týrıster sany aıtarlyqtaı artady, – dedi «Astana Tourism» týrızmdi damytý ortalyǵy departamentiniń dırektory Bazarbek Qamysbaev.
Sonymen qatar týrısterdiń qaýipsizdigin týrıstik polıtsııa qamtamasyz etedi. Astana qalasy Polıtsııa departamentiniń týrıstik polıtsııa qyzmeti sheteldik jáne otandyq qonaqtarǵa birneshe tilde kómek kórsetedi.
– Biz týrısterdiń qaýipsizdigin qadaǵalaımyz. Qajet bolǵan jaǵdaıda tıisti qyzmetterge habarlaımyz. Jumysymyz 12 saǵattyq aýysymmen uıymdastyrylǵan, – dedi polıtsııa kapıtany Qulpynaı Táńirbergen.
Osylaısha, elordada týrısterge arnalǵan aqparattyq qoldaý men qaýipsizdik júıesi qatar damyp, qala qonaqtaryna qolaıly jaǵdaı jasalyp otyr.
Aıta keteıik, Bıyl Ertis-Baıan óńirine keletin týrıster sany kúrt kóbeıedi.
