Astanada túriktiń «Kóbelektiń túsi» fılmi kórsetiledi
Aıtýly oqıǵaǵa oraı, Astanadaǵy ıÝnýs Emre atyndaǵy túrik mádenıet ortalyǵy Túrkııanyń Qazaqstandaǵy elshiliginiń qoldaýymen «Aılyq túrik fılmderi kúni» sharasyn bastaǵan bolatyn. Osynyń aıasynda 20 mamyrda «Kóbelektiń túsi» atty kıno týyndyny Astana halqyna usynady.
Eske sala keteıik, «Túrik fılmder kúni» osydan 2 aı buryn bastalǵan edi. Naýryz aıynda «Sońǵy hat», sáýir aıynda «Uzaq hıkaıa» atty fılmder astanalyqtarǵa tartý etilgen, dep habarlaıdy QazAqparat.
2013 jyly túsirilgen «Kóbelektiń túsi» fılminiń stsenarııin jazǵan ári rejıssery Iylmaz Erdogan. Basty rólderdi Qazaqstanda keńinen tanymal túrik akterler Kyvanch Tatlytýg pen Mert Fyrat somdaǵan. Fılmniń oqıǵasy Túrkııanyń Zongýldak qalasynda turatyn jas aqyndar Rúshtú Onýr men Mýzaffer Taııp Ýslýnyń tóńireginde órbıdi. Sol kezeńde aqyndar bilim alǵan «Mehmet Chelıker» lıtseıinde ádebıet páni muǵalimi bolyp jumys istegen Behchet Nedajıgıldiń rólinde ataqty túrik akter Iylmaz Erdogan oınaıdy.
Atap ótý kerek, fılm 2013 jyly 86-akademııalyq syılyq komıssııasy tarapynan «shet tildegi eń úzdik fılm» nomınatsııasy boıynsha Túrkııa atynan Oskar syılyǵyna usynyldy.
Fılmde 1941 jyldary bolǵan oqıǵalar baıandalady. Eki jas aqyn Rúshtú Onýr men Mýzaffer Taııp Ýslý Zongýldaktaǵy kómir shahtasynda jumys isteıdi. Ekeýi de ádebıetke etene jaqyn. Jas Túrkııa memleketi jańadan jańǵyrý kezeńin bastan ótkerip jatqan 1940 jyldary Evropada Ekinshi dúnıejúzilik soǵys jalǵasyp jatty. Osyndaı aýyr kezeńde eki jas aqyn qurt aýrýyna shaldyǵady. Biraq aýyrtpashylyqtarǵa qaramastan qos aqyn óz ortalarynda poezııany nasıhattap, ádebıetke degen halyqtyń qyzyǵýshylyǵyn týǵyzý úshin jandaryn salady. Mýzaffer fılmdegi basqa bir keıipker ákimniń qyzy Sýzan Ózsoıǵa ǵashyq. Alaıda, qurt aýrýy jastardyń densaýlyǵyna úlken qaýip týǵyzdy. Osy jáne basqa sebepterge baılanysty Sýzannyń ata anasy qyzdarynyń olarmen dos bolýyna qarsy...
20 mamyrda saǵat 17.00-de «Kerýen» OSO Kınoparktyń 4 zalynda kórsetiletin fılmdi Astana turǵyndary men qala qonaqtary tegin tamashalaı alady.