Astanada túrikmen ádebıetiniń klassıgi Maqtymqulynyń 290 jyldyǵyna arnalǵan konferentsııa ótti
Bul sharaǵa túrkitildes memleketterdiń elshileri, memleket jáne qoǵam qaıratkerleri, QR Parlamenti Senaty men Májilisiniń depýtattary, sondaı-aq kórnekti jazýshylar, túrkitildes elderdiń ǵalymdary qatysty.
Konferentsııany Qazaqstannyń Eńbek Eri Ábish Kekilbaev quttyqtaý sózben ashty. Halyq jazýshysy bul sharanyń eki eldiń arasyndaǵy rýhanı-adamgershil negizderdi nyǵaıta túsetinin atap ótip, Maqtymquly shyǵarmalaryn keńinen taratyp, jastardyń boıyna sińirý qajettigin basa aıtty.
Otyrys barysynda Túrikmenstannyń Qazaqstandaǵy Tótenshe jáne Ókiletti elshisi Maqtymquly Aqmyradov, Qazaqstan Jazýshylar odaǵynyń tóraǵasy, QR Parlamenti Senatynyń depýtaty Nurlan Orazalın, «Egemen Qazaqstan» respýblıkalyq gazeti» AQ prezıdenti Saýytbek Abdrahmanov, QR Prezıdenti baspasóz qyzmeti jetekshisiniń orynbasary Baýyrjan Omarov, túrkitanýshy Shákir Ybyraev, túrikmenstandyq ǵalym Annagýrban Ashırov baıandama jasady.
Konferentsııa barysynda oǵan qatysýshylar qarar qabyldady, Maqtymqulynyń ánderi oryndaldy.
Bul shara Túrki akademııasynda jalǵasýda. Akademııa prezıdenti Darhan Qydyráli jáne Túrikmenstannan kelgen qonaqtar eki eldiń qatynastaryna qatysty ártúrli máselelerdi talqylaıdy.
Maqtymquly (laqap aty - Fragı) - 18 ǵ-da ómir súrgen túrikmen halqynyń klassık aqyny. Esimi Shyǵystyń uly aqyndary Fırdoýsı , Saǵdı, Nızamı, Naýaılarmen qatar turatyn túrikmen ádebıetiniń klassıgi. Túrkmenniń áıgili aqyny Kemıneniń:"Maqtymquly aqyndyq aımaqtyń astyǵyn túgel oryp ketti, biz sodan qalǵan birdi-ekili masaqty terýshiler ǵanamyz",- degen sózderinen-aq aqynǵa degen súıispenshiligin, onyń talantyna degen erekshe iltıpat-yqylasty anyq kórýge bolady.
Aýyl mektebinde, keıin Hıýadaǵy Sherǵazy medresesinde oqyǵan.Maqtymquly 1733 jyly Gerkez aýylynda dúnıege kelgen. Ákesi Dovletmamed Azadı tek qana túrikmen eline emes, búkil shyǵysqa tanymal aqyn boǵan. Maqtymquly ákesinen kóp úırenedi, hat tanyp, erte eseıedi. Maqtymquly ómirdiń aýyrtpashylyqtaryn kóp kóredi. Óz óleńderiniń qoljazbasyn shapqynshylyq kezinde joǵaltady.
Aqyn óleńderiniń taqyryby ár alýan. Onda batyrlyqty madaqtaǵan jyrlar da, shyǵys úlgisindegi dıdaktıkalyq saryndar da, eski ańyzdar sıýjetine jazylǵan shyǵarmalar men tabıǵatty, adal mahabbatty ardaqtaıtyn lırıka da mol kezdesedi. Aqyn túrikmen rýlarynyń ózara jaýlasýshylyǵyn aıaýsyz shenep, olardy únemi birlikke shaqyryp otyrǵan. Ol elin súıgen, eli súıgen patrıot. "Erdiń erligi erimenen" degen ıdeıa onyń óleńderinde jıi ushyrasady. El bastar batyr uldardy, olardyń elimen yntymaǵyn aqyn súısine jyrlaǵan. Onyń shyǵarmalarynda eldiń táýelsizdigin saqtaý úshin tek birliktiń jetkiliksizdigi, erlik pen batyrlyq dástúrdi berik saqtaý qajettigi qozǵalady. Osydan baryp onyń shyǵarmalarynyń basty keıipkeri-el úshin eńiregen erdiń jańa obrazymen tolysady. Mundaı jigittiń beınesinen aqyn birsózdilikti, tabandylyqty, elin qorǵaý úshin árqashan daıar batyrlyqty kórsetedi
Ol halqyna 500-den astam shyǵarma qaldyrǵan. Onyń shyǵarmalary tatar, bashqurt, qazaq jáne basqa da kóptegen álem tilderine aýdarylǵan.
Maqtymquly shyǵarmalary qazaq tilinde («Tańdamaly óleńder», 1947 ; «Tańdamaly óleńder», 1959 ; «Óleńder», 1968 ) birneshe ret jeke jınaq bolyp jaryq kórdi. Maqtymquly men Abaı poezııalarynda birine-biri etene jaqyn saryndar men áýender jıi kezdesip otyrady. Ekeýi de el birligin, adamdar arasyndaǵy tatýlyqty, yntymaqty aıryqsha qasterlegen. Maqtymquly shyǵarmalaryn qazaq tiline belgili qazaq aqyndary Ǵ.Ormanov, Ǵ.Qaıyrbekov, D.Qanatbaev aýdardy.
Álemniń kóptegen qalalaryna onyń eskertkishteri qoıylǵan, kóshelerge esimi berilgen. Qazaqstan astanasynda da aqyn qurmetine atalǵan kóshe ber.
18 mamyr - Túrikmenstan úshin erekshe mereke. Bul kúni «Maqtymquly Fragı poezııasy, birlik pen ulttyq túleý kúni» búkilhalyqtyq meıram retinde atalyp ótedi.