Astanada turǵyndardyń suraqtary men shaǵymdaryna arnalǵan 30 jáshik ornatyldy
ASTANA. QazAqparat - Elordada aýdan ákimderiniń halyq aldynda esep berý naýqandaryna daıyndyq jumystary bastalyp ketti. Qalada turǵyndardyń shaǵymdary men suraqtaryn, sonymen qatar usynystaryn jınaýǵa arnalǵan arnaıy 30 jáshik ornatyldy.
Bul týraly elorda ákimdiginiń resmı saıty jazady.
Almaty aýdanynda atalmysh jáshikter «Evrazııa», «Aımaq-Taý», «Esil», «Qazaqstan», «Gúljan», «Orbıta» jáne «Astyqjan» saýda úılerinde, sondaı-aq «Internatsıonalnyı», «Promyshlennyı» men «Jeleznodorojnyı» turǵyn alabtarynda ornalastyryldy.
Saryarqa aýdanynda arnaıy 10 jáshik ornatylǵan. Olar «Kolos», «Dıona», «Azat», «Kóktal-2» saýda ortalyqtarynda, «Jandar», «Mechta», «Rahat», «Shık» dúkenderinde, «5 mınýt» sýpermarketinde jáne «Tamyz» turǵyn alabyna qoıylǵan.
Halyqtyń shaǵymdary men saýaldaryna arnalǵan osy sııaqty taǵy 10 jáshik Esil aýdanynda - «Mega», «Kerýen», «Saryarqa» jáne «Han Shatyr» saýda, oıyn-saýyq ortalyqtarynda, №69 jáne №24 orta mektepterinde, sonymen birge Esil aýdany ákimdigi apparatynyń ǵımaratynda, Halyqqa qyzmet kórsetý ortalyǵynda jáne aýdandyq Salyq basqarmasynda ornalasqan.
Qalalyq aýdan ákimderiniń halyq aldynda esep berý naýqandary birneshe kúnge jalǵasady, turǵyndardyń barlyq shaǵymdary men saýaldary tıisti quziretti organdarǵa joldanady, al jaýaptardy esep berý kezinde alýǵa bolady.
Taǵy da bir aıta keter jaıt, qala turǵyndary kókeıdegi suraqtaryn esep berý kezinde de qoıa alady.
Buryn habarlanǵandaı, Astana qalasy aýdandary ákimderiniń halyq aldynda esep berýi aqpannyń 2-9 aralyǵynda, al Astana qalasynyń ákimi Ádilbek Jaqsybekovtyń halyq aldynda esep berýi 18 aqpanda saǵat 10.00-de Kongress-hollda ótedi.
