Astanada turǵyndardyń mazasyn alǵan túngi klýb jazaǵa tartyldy
ASTANA. QazAqparat - Astanada túngi ýaqytta turǵyndardyń mazasyn alǵan túngi klýb basshylyǵy ákimshilik jaýapkershilikke tartyldy, dep habarlaıdy «QazAqparat» HAA tilshisi.
Mekemeniń shýyly týraly eki táýlik boıy Jedel basqarý ortalyǵyna tolassyz shaǵymdar kelip túsken.
Buǵan deıin qoǵam qaıratkeri, «Atameken» QR Ulttyq kásipkerler palatasy tóraǵasynyń orynbasary Murat Ábenov áleýmettik jelide «Moskva» bıznes-ortalyǵyndaǵy mekemeniń túngi ýaqyttaǵy shýylyna narazylyq bildirgen edi.
«Osydan eki apta buryn bir bedeldi kásipker Astanada meshittegi azanshynyń daýysynan uıyqtaı almaımyn dep shý kóterip, ımamdarǵa habarlasyp, daýysyn azaıtýǵa kóndirdi, - dep jazdy Murat Ábenov óziniń Facebook paraqshasyna. - Al endi barlyǵyna teń talap bolý kerek. Qalanyń qaq ortasynda túngi úshte, "Moskva" bıznes ortalyǵynda ornalasqan meıramhana qarama-qarsy úıdegi azamattardyń mazasyn aldy. Polıtsııa qyzmetkerleri eskertý jasaǵanymen, meıramhana qojaıyndary ony elemedi. Tártip saqshylary bir saǵat qasynda turyp, toqtata almady. Sonda olarǵa zań bólek pe? Nege teń qaramaımyz?»
Óz kezeginde Astana qalasynyń ákimi Áset Isekeshev eks-májilismenniń túngi dabylyna jedel jaýap qaıtardy. «Qabyldandy. Mundaı jaǵdaıda polıtsııa batyl bolýy tıis. Shara qoldanamyz», - dep jaýap berdi ol.
Kóp uzamaı, Astana qalasynyń jergilikti polıtsııa qyzmeti tártip buzýshylardyń birneshe ret jaýapkershilikke tartylǵanyn málimdedi.
«16 maýsym kúni «Moskva» bıznes ortalyǵynda jańa klýb ashyldy. Sol túni saǵat 02:00-de 102 pýltine jaqyn mańda turatyn qala turǵyndarynan tynyshtyqty buzý týraly shaǵym túsken. ІІD Jedel basqarý ortalyǵynyń kezekshisi oqıǵa ornyna kezekshi ýchaskelik ınspektor, polıtsııanyń aǵa leıtenanty J.Dilmanovty jibergen. Ol Ákimshilik quqyq buzý týraly kodekstiń 437-baby, 1-bólimi boıynsha ákimshilik hattama toltyryp, klýb basshylyǵyna 22690 teńge kóleminde aıyppul salǵan», - dep habarlady Astana qalalyq ІІD Jergilikti polıtsııa qyzmeti.
Biraq, tún tynyshtyǵyn buzǵandardy bir aıyppul toqtata almady. Kelesi túni de túngi klýbtyń shýyly qaıtalanyp, polıtsııaǵa taǵy da shara qoldanýǵa týra keldi.
«Maýsymnyń 17-inen 18-ine qaraǵan túni atalǵan klýbtyń atyna qala turǵyndarynan 21 shaǵym kelip tústi. Astana qalalyq ІІD jedel basqarý ortalyǵynyń kezekshisi oqıǵa ornyna jergilikti polıtsııa qyzmetiniń Yrǵyz-134 ekıpajyn jiberdi. Qyzmetkerler qatty oınaǵan mýzykany sóndirdi jáne mekeme ákimshiligimen túsindirý jumystaryn júrgizdi. Ákimshilik hattama toltyrý úshin klýb dırektory Esil aýdandyq ishki ister basqarmasyna jetkizildi. ІІB ǵımaratynda kezekshi ýchaskelik ınspektor, polıtsııa leıtenanty K. Áriphan ÁKBK 345-babyn buzǵany úshin ákimshilik hattama toltyryp, klýb dırektoryna 11345 teńge kóleminde aıyppul saldy. Sol ýaqytta jedel basqarý ortalyǵynyń 102 pýltine atalǵan klýbtyń tynyshtyqty buzǵany týraly taǵy da qońyraýlar tústi. Jedel kezekshi shý ornyna «Bars-5», «Bars-6», «Yrǵyz-134» ekıpajdaryn jiberdi. Qyzmetkerler mýzykany sóndirdi jáne klýb menedjerin Esil aýdandyq ІІB jetkizip, túsinikteme jazǵyzdy. Qazirgi ýaqytta klýb menedjerine qatysty kodekstiń 437-baby, 2-bólimi boıynsha ákimshilik is qozǵaldy», - dep habarlady tártip saqshylary.
