Astanada turǵyn úıge tabıǵı gaz qubyryn tartýdyń baǵasy belgilendi

ASTANA. QazAqparat – Elordada turǵyn úıge kógildir otyn qubyryn qosý boıynsha qurylys-montajdaý jumystary 97 000 teńgeden 103 000 teńgege deıin turady, dep habarlaıdy QazAqparat tilshisi qalalyq básekelestikti qorǵaý jáne damytý departamentine silteme jasap.

«Tutynýshylarǵa tabıǵı gaz qubyryn qosý kezinde qurylys-montajdaý qyzmetteri naryǵynda qyzmet kórsetetin sýbektilerdiń monopolııaǵa qarsy komplaensi syrtqy aktisi kelisildi. Qurylys-montajdaý jumystary 97 000 teńgeden 103 000 teńgege deıin turady (25-30 m boıynsha negizdelgen)», - delingen habarlamada.

Kórsetilgen somaǵa jobalyq-smetalyq jáne atqarýshylyq-tehnıkalyq qujattama, qurylys-montajdaý jumystary men materıaldyq shyǵyn kiredi.

Monopolııaǵa qarsy komplaens – básekelestik týraly zańnamanyń buzylýyn boldyrmaý jónindegi sharalar júıesi. Naryq sýbektileri úshin monopolııaǵa qarsy komplaens júıesin engizýdiń basty artyqshylyǵy joǵary aıyppuldarmen jáne jaǵymsyz saldarlarmen baılanysty básekelestik zańnamasyn buzý táýekelderin barynsha azaıtý.

«Monopolııaǵa qarsy kelisimge qol qoıý arqyly qurylys naryǵynyń kásipkerleri naryqtyq ekonomıka men adal básekelestik qaǵıdattaryn saqtaýǵa, qurylys-montajdaý qyzmetteri qunynyń negizsiz ósýine jol bermeý sharalaryn qabyldaýǵa mindetti», - dep málimdedi departamentten.