Astanada Turǵyn úı baǵdarlamasyna qatysqandardyń arasynda jekemenshik baspanalary bar azamattar anyqtalýda - ákim
ASTANA. 26 sáýir. QazAqparat /Gúlmıra Álıakparova/ - Astanada 2008-2010 jyldarǵa arnalǵan Memlekettik turǵyn úı baǵdarlamasynyń ekinshi kezegi boıynsha páter alýǵa úmit bildirgenderdiń arasynda jekemenshik baspanalary bar azamattar anyqtalýda.
Bul týraly óziniń jeke blogynda azamattardan kelip túsken saýaldarǵa jaýap bergen elorda ákimi Imanǵalı Tasmaǵambetov aıtty.
Astana basshysynyń jeke blogyna turǵyndardan kún saıyn túsip jatqan saýaldardyń basym deni turǵyn úı máselesine qatysty, sonyń ishinde 2008-2010 jyldarǵy Memlekettik turǵyn úı baǵdarlamasynyń ekinshi kezegine qatysqan azamattardan túsken suraqtar da bar. Olardy turǵyn úı komıssııasynyń sheshimderi qashan shyǵatyndyǵy qyzyqtyrady.
«2008-2010 jyldarǵy Memlekettik turǵyn úı baǵdarlamasynyń ekinshi kezegine qatysqan úmitkerlerdiń taǵatsyzdyǵyn túsinemin. Sondyqtan onyń júzege asyrylý barysyn túsindirip óteıin. Membaǵdarlamanyń atalmysh kezeńinde 2344 páter úlestiriledi. Oǵan qatysý úshin qabyldaý komıssııasyna 27 myńǵa jýyq ótinim kelip tústi. Barlyq qujattar belgilengen tártip boıynsha tirkelip, úmitkerlerdiń Astanada ne basqa óńirlerde baspanalary bar-joǵyn anyqtaý úshin ádilet organdaryna jiberildi», - dep jazdy ákim.
I.Tasmaǵambetovtyń sózine qaraǵanda, osy kúnge deıin ádilet organdary 6 myńǵa jýyq azamattyń ózge páteri bar-joǵyn tekserdi. Onyń 737-sinde turǵyn jaıy bar ekendigi anyqtaldy. Membaǵdarlamanyń erejesi boıynsha bul olardy atalmysh baǵdarlamaǵa qatysý quqyǵynan aıyrady.
«Bul jaǵdaı árbir kandıdatýra boıynsha ádil sheshim shyǵarý úshin, mundaı yqtııatty jumysty júrgizýge qosymsha ýaqyt qajettigin kórsetip otyr. Sondyqtan sizderdi shydamdylyq tanytyp, ádilet organdary tekserý jumystaryn tolyq kólemde aıaqtaǵansha tosýdy suraımyn. Aıta keteıin, Membaǵdarlamanyń qatysýshylaryn anyqtaý úderisin tezdetý úshin, turǵyn úı basqarmasynyń qyzmetkerleri ádilet organdarynan oń qorytyndymen túsip jatqan isterdiń kólemine qaraı, balldardy taǵaıyndaý jumystaryn júrgizip jatyr. Komıssııanyń balldardy taǵaıyndaý qorytyndysy shyqqannan keıin, olar bizdiń saıtta jáne qalalyq gazetterge ornalastyrylatyn bolady», - dep túıindedi jaýabyn Astana basshysy.
Eske salaıyq, 2008-2010 jyldarǵy turǵyn úı baǵdarlamasynyń ekinshi kezegi boıynsha memlekettik qordan baspana alýǵa úmiterlerden qujattardy qabyldaý 2010 jyldyń 29 jeltoqsany men 2011 jyldyń 29 qańtary aralyǵynda júrgizildi.
