Astanada turǵyn úı aýlasyndaǵy gazgolder órtendi
ASTANA. QazAqparat - Astanada Toraıǵyrov kóshesinde ornalasqan turǵyn úıdiń aýlasyndaǵy gazgolder órtendi, dep xabarlaıdy Astana qalalyq TJD-nyń baspasóz qyzmeti.
«20 shildede 14 saǵat 12 mınýtta 101 qyzmetine Toraıǵyrov kóshesi 3\1 úıiniń aýlasynda órt shyqqany jóninde xabar kelip tústi. Kelip jetken órt sóndirýshi brıgada ol jerde gazgolder (suıytylǵan gaz saqtalatyn úlken bóshke) órtenip jatqandyǵyn anyqtady», - delingen xabarlamada.
Qutqarýshylardyń xabarlaýynsha, órtti sóndirýge qalalyq TJD jeke quramynyń 25 qyzmetkeri men 4 arnaıy texnıka jumyldyrylǵan. Sonymen qatar gaz qyzmetiniń mamandary da jumys jasap jatyr.
Órt 14 saǵat 33 mınýt ketkende sóndirildi. Qaza tapqandar men jaraqattanǵandar joq. Órt sebepteri anyqtalýda.
