Astanada turǵyn baǵdarlamasy boıynsha páterge qujat qabyldaý júrgizilýde
ASTANA. QazAqparat - «Qazaqstan ıpotekalyq kompanııasy» ıpotekalyq uıymy» aktsıonerlik qoǵamy 2015 jylǵy qazanda Astana qalasynda satyp alý men jalǵa berý úshin mynadaı obektilerden 256 páter qarastyryp jatyr: Aqmola oblysy, Tselınograd aýdany, Qosshy kenti, Á. Jangeldın kóshesi meken-jaıynda ornalasqan «Akademııa» turǵyn úı kesheninen 95 páter; Astana qalasy, «Almaty» aýdany, Ońtústik-Shyǵys turǵyn úı alaby (sol jaǵy), Qobylandy batyr kóshesi mekenjaıynda ornalasqan № 7 d, 7 g úılerden 161 páter.
Bul týraly elorda ákimdiginiń resmı saıtynda habarlandy.
Turǵyn úı satyp alýmen jaldaýǵa 20 jylǵa deıingi merzimge beriledi (kámeletke tolǵanǵa deıin ata-analarynan aıyrylǵan jıyrma toǵyz jasqa tolmaǵan jetim balalar men ata-anasynyń qamqorlyǵynsyz qalǵan balalar úshin jalǵa berý merzimi 30 jylǵa deıin uzartylýy múmkin). Eń az jalǵa berý merzimi 5 jyldy quraıdy (bes jyl ótken soń jalǵa alýshynyń merziminen buryn satyp alýǵa quqyǵy bar).
Qazaqstan Respýblıkasy Úkimetiniń 2014 jylǵy 28 maýsymdaǵy № 728 qaýlysymen bekitilgen Óńirlerdi damytýdyń 2020 jylǵa deıingi baǵdarlamasynyń sharttaryna sáıkes qujattardy qabyldaý tek qana e.astana.kz veb-portaly arqyly ótinish berýshiniń elektrondyq tsıfrlyq qoltańbasyn (budan ári - ETsQ) paıdalanýmen iske asyrylatyn bolady.
Qujattardy qabyldaý 2015 jylǵy 19-23 qazan (qosa alǵanda) aralyǵynda júrgiziledi. Osy qujattar qabyldaý aıasynda ótinish joǵaryda kórsetilgen nysannyń bireýi boıynsha ǵana qabyldanady.
Portaldyń jumys ýaqyty - táýlik boıy.
Baǵdarlamaǵa sáıkes bul baǵytta Astana qalasynda kommýnaldyq turǵyn úı qorynan turǵyn úıge muqtajdar kezeginde turǵan (kezektegiler) kelesi sanattar boıynsha azamattar ǵana qatysa alady:
- kóp balaly otbasylar;
- tolyq emes otbasylar;
- múgedek balasy bar nemese ony tárbıelep otyrǵan otbasylar;
- jetim balalar, ata-anasynyń qamqorlyǵynsyz qalǵan balalar;
- oralmandar;
- memlekettik qyzmetkerler, áskerı qyzmetkerler, arnaýly memlekettik organ qyzmetkerleri, bıýdjettik uıym qyzmetkerleri.
