Astanada turǵyndarǵa tegin zańgerlik kómek kórsetildi
ASTANA. KAZINFORM — «Zań men tártip» aktsııasy aıasynda «Han Shatyr» saýda jáne oıyn-saýyq ortalyǵynda «Halyq zańgeri» men «Quqyqtyq dárihana» aktsııalary ótti, dep habarlaıdy Astana ákimdiginiń resmı saıty.
Onda elorda turǵyndary men qonaqtary ózderin tolǵandyrǵan quqyqtyq máseleler boıynsha bilikti zańgerlik keńesti tegin aldy.
Aktsııalar aıasynda azamattardy memlekettik organdardyń ókilderi, zańgerler men advokattar qabyldady. Mamandar kelýshilerge quqyqtardy qorǵaý, zańnama jáne quqyq qoldaný tájirıbesine qatysty keń aýqymdy máseleler boıynsha keńes berdi. Jedel sheshimdi qajet etetin máselelerge erekshe kóńil bólindi.
Jeke qabyldaý barysynda azamattarǵa túrli quqyqtyq máselelerdi sheshý joldary túsindirilip, memlekettik organdarǵa júginý tártibi aıtyldy. Sondaı-aq óz quqyqtary men múddelerin qorǵaýdyń zańnamada kózdelgen tetikteri týraly aqparat berildi.
— Іs-sharaǵa 20-ǵa jýyq uıym qatysyp jatyr. Halyqtyń quqyqtyq saýattylyǵyn arttyrý maqsatynda Nura aýdanynyń ákimdigi aýmaqtyq quqyq qorǵaý organdarymen birlesip, turǵyn úı keshenderiniń turǵyndarymen jıi kezdesýler ótkizedi. Sondaı-aq saýda jáne oıyn-saýyq ortalyqtarynda, kolledjderde, mektepterde jáne qoǵamdyq keńistikterde kezdesýler uıymdastyramyz. Zań men tártip — bul tek ákimshilik nemese qylmystyq jaýapkershilik qana emes. Bul — qalamyzdyń turǵyndary men qonaqtarynyń qoǵamdyq oryndarda zań talaptaryn ǵana emes, ádep normalaryn da saqtaýǵa degen azamattyq ustanymy, — dedi Nura aýdany ákiminiń orynbasary Álııa Ábsemetova.
Qoljetimdi zańgerlik keńes azamattarǵa óz quqyqtary men mindetterin jaqsy túsinýge, sondaı-aq olardy qorǵaý úshin ýaqtyly shara qabyldaýǵa kómektesedi.
— Men úshin bul is-shara óte yńǵaıly boldy. Munda kelip, kópten beri mazalap júrgen suraǵyma jaýap alamyn dep kútpegen edim, — dedi qala turǵyny Aıgúl Gúlkıaeva.
«Halyq zańgeri» men «Quqyqtyq dárihana» aktsııalary azamattar, memlekettik organdardyń ókilderi jáne zańgerler qaýymy arasynda tikeleı dıalog ornatýǵa múmkindik beretin alańǵa aınaldy.
Buǵan deıin zańger alımentke arnalǵan arnaıy shottyń qalaı jumys isteıtinin túsindirdi.
