Astanada turǵyndar sportpen aınalysyp, demalatyn jańa oryn paıda boldy
ASTANA. KAZINFORM — Astananyń Saraıshyq aýdanynda jańa qoǵamdyq keńistik paıdalanýǵa berildi. Munda fýtbol alańy, vorkaýt aımaǵy jáne demalys oryndary jabdyqtalǵan, dep habarlaıdy elorda ákimdiginiń resmı saıty.
Abattandyrý jumysy aıasynda aýmaqqa 900 sharshy metr tósemtas tóselip, úsh kóleńkeli bastyrma, oryndyqtar men qoqys jáshikteri ornatyldy. Sonymen qatar 19 jaryq shamy qoıyldy. Onyń 15-i saıabaq shamy bolsa, tórteýi — kóshe shamy. Fýtbol alańy men vorkaýt aımaǵy da jabdyqtaldy. Aýmaqty kógaldandyrý jumystary jalǵasýda. Barlyǵy 200 aǵash otyrǵyzý josparlanǵan, qazir onyń 60-y egildi.
Jańa keńistiktiń ashylýyna oraı 13-15 jas aralyǵyndaǵy jasóspirimder arasynda fýtbol týrnıri uıymdastyryldy. Turǵyndar úshin anımatorlardyń qatysýymen kontserttik jáne oıyn-saýyq baǵdarlamasy da ótti.
Іs-shara jasóspirimder arasynda nashaqorlyqtyń aldyn alý jáne salaýatty ómir saltyn nasıhattaýǵa baǵyttalǵan profılaktıkalyq jumys aıasynda uıymdastyryldy. Esirtki qylmysyna qarsy is-qımyl basqarmasynyń eriktileri men Saraıshyq aýdanynyń TJD qyzmetkerleri qatysýshylarǵa túsindirý jumysyn júrgizdi.
Balalardyń qaýipsizdigine de erekshe nazar aýdaryldy. Ata-analarǵa órt qaýipsizdigi erejeleri, balalardy qaraýsyz qaldyrmaý jáne tereze mańyna jıhaz qoımaý qajettigi eskertildi.
Saraıshyq aýdany ákimdiginiń ókilderiniń aıtýynsha, bıyl aýdan aýmaǵynda úsh qoǵamdyq keńistik ashylǵan.
Іs-sharaǵa «Taza Qazaqstan» jáne «Zań men tártip» ıdeologemalarynyń sımvoldyq keıipkerlerine aınalǵan Temirtós atty robot-ıt pen Tártipbek te qatysty.
Jańa qoǵamdyq keńistik aýdan turǵyndarynyń sportpen shuǵyldanyp, tynyǵyp, otbasymen jáne dostarymen birge ýaqyt ótkizýine arnalǵan taǵy bir qolaıly orynǵa aınaldy.
Aıta keteıik, bıyl Astana qalasynyń ákimdigi 173 aýlany jáne qoǵamdyq keńistikti (saıabaqtar, gúlzarlar, jelekjoldar) abattandyrýdy josparlap otyr.
Osyǵan deıin elordada ulttyq qolóner mektebi ashylǵanyn jazdyq.
