Astanada turǵyn úı kezeginen zańsyz shyǵarylǵan ana sotta jeńiske jetti

ASTANA. KAZINFORM — Kassatsııalyq sot satysy jeti balanyń anasy men Astana qalalyq Turǵyn úı ınspektsııasy basqarmasy arasyndaǵy uzaqqa sozylǵan daýǵa núkte qoıdy.

Áıel 2009 jyldan beri memlekettik qyzmetshi jáne «Altyn alqa» qurmet belgisimen marapattalǵan kópbalaly ana retinde pátermen qamtamasyz etiledi dep júrgenine qaramastan, turǵyn úı kezeginen shyǵarylǵan. Úı kezeginen alyp tastaýǵa buryn kúıeýi men týysynyń atyna tirkelgen, daý týyndaǵan kezde ıelikten shyǵarylǵan jyljymaıtyn múlik týraly málimetter negiz bolǵan. 

— Birinshi jáne apellıatsııalyq satydaǵy sottar turǵyn úı ınspektsııasynyń áreketin zańsyz dep tanyp, áıeldiń turǵyn úı kezegin qalpyna keltirý týraly qaýly shyǵardy. Ákimshilik ister boıynsha kassatsııalyq sot bul sheshimderdiń zańdylyǵyn rastady. Sot aktilerinde «Turǵyn úı qatynastary týraly» Zańynyń normalaryna sáıkes, «Altyn alqa» belgisimen marapattalǵan kópbalaly analar muqtaj dep tanylyp, belgilengen tártipte esepte turǵan bolsa, turǵyn úı alǵanǵa deıin kezekten shyǵarýǵa bolmaıtyny basa kórsetilgen, — delingen habarlamada.

Buryn azamattyń atyna sanıtarlyq-tehnıkalyq talaptarǵa saı kelmeıtin (ıaǵnı turýǵa qolaısyz) úı tirkelgen bolsa da, eger ol adam qazir shynymen baspanaǵa muqtaj bolsa, ony úı kezeginen alyp tastaýǵa bolmaıdy.

Sondyqtan kassatsııalyq sot bul iste azamattyń (kópbalaly ananyń) quqyqtary buzylǵanyn rastady. Al birinshi jáne apellıatsııalyq sottardyń buryn shyǵarǵan sheshimderi zańǵa jáne ádildik qaǵıdalaryna tolyq saı dep tanyldy. Bul sheshim kópbalaly analar sııaqty áleýmettik turǵydan osal azamattardyń quqyqtary qorǵalýy tıis ekenin taǵy bir márte kórsetti.

Budan buryn kópbalaly otbasylar men nagradtalǵan analar 354 mlrd teńge járdemaqy alǵany belgili boldy.