Astanada turatyn UOS ardagerleri Jeńis kúnine 150 000 teńgeden alady

ASTANA. 3 mamyr. QazAqparat - Bıyl elordada turatyn Uly Otan soǵysyna qatysýshylar men múgedekterge Jeńis kúnine oraı jergilikti bıýdjetten 150 000 teńge tólenedi. Qalalyq Jumyspen qamtý jáne áleýmettik baǵdarlamalar basqarmasynyń osy bastamasy búgin depýtattar tarapynan qalalyq máslıhattyń kezekti sessııasynda qoldaý tapty. Bul týraly astana.kz saıty habarlaıdy.

Sonymen qatar, 9 mamyr merekesine soǵys ardagerlerine teńestirilgender de aqshalaı kómek alady.

«Qazir qalada turatyn 292 Uly Otan soǵysynyń qatysýshysy men múgedegine 150 000 teńgeden tólenedi. Al UOS qatysýshylar men múgedekterine jeńildikter men kepildikter boıynsha teńestirilgender, ıaǵnı 1871 adam 20 000 teńgeden alady. Basqa da sanattaǵy azamattarǵa - tyl eńbekkerleri, qaza tapqan jaýyngerlerdiń jesirleri men otbasylaryna 10 000 teńge kóleminde kómek kórsetiletin bolady», - dedi Jumyspen qamtý jáne áleýmettik baǵdarlamalar basqarmasynyń bastyǵy Alma Altybaeva.

Onyń aıtýynsha, 9 mamyrǵa jergilikti bıýdjetten barlyǵy bir rettik 137 090 000 teńge áleýmettik kómek kórsetý josparlanǵan.

Aıta ketý qajet, búgingi kúni elordada turatyn barlyq Uly Otan soǵysyna qatysýshy ardagerler men múgedekter pátermen tolyq qamtylǵan. Sonymen qatar, merekelerdegi bir rettik tólemderden basqa, ardagerlerge basqa da áleýmettik kómek túrleri, atap aıtqanda, ambýlatorııalyq emdelý kezinde dárilik preparattarmen qamtamasyz etý; qalalyq qoǵamdyq kólikterde tegin júrý; sanatorııalyq-kýrorttyq em alýlar; merzimdik basylymdarǵa tegin jazylý; tegin tis protezin salý men basqa da qyzmetter kórsetiledi.