Astanada turaqty tirkeýge turýshylardy shekteý qala bıýdjetine keri áser etpeıdi — UEM

ASTANA. KAZINFORM — Ulttyq ekonomıka mınıstriniń birinshi orynbasary Azamat Ámrın Senatta ótken dóńgelek ústelden keıin ótken baspasóz máslıhatynda Astana páterlerine turaqty tirkeýge turýshylardyń baspana sharshy metrine qaraı shekteý sharasy normasyna qatysty pikir bildirdi.

Jýrnalıst atalǵan usynystyń qala bıýdjetine túsetin salyqqa qalaı áser etetinin suraǵan edi.

— Astana, Almaty, Atyraý qalalary bıýdjetke donor bolyp otyrǵany ras. Jyl saıyn kútilgen boljamdardan artyq túsim kelip jatyr. Onyń birneshe sebebi bar. Astana turaqty tirkeýge turatyndardyń sanyn shekteý salyq túsimderin azaıta ma degenge kelsek, men olaı bolady dep oılamaımyn. Birinshiden, jyl saıyn jaqsy dınamıka baıqalyp otyr. Tirkelgen kásipkerler sany artyp keledi. Astana bıýdjetiniń áleýmettik baǵyttaǵy ǵana emes, damý baǵytyndaǵy shyǵystary da artyp otyr. Sondyqtan, meniń oıymsha tirkeýge shekteý qoıýdan bıýdjet kólemi azaıady dep kútip otyrǵan joqpyz, — dedi Azamat Ámrın.

Buǵan deıin Astanada turǵyndardy páterge tirkeýge qoıýdyń jańa tártibi qashan qabyldanatynyn jazǵan edik.