Astanada tuńǵysh ret zamanaýı mýzyka festıvali ótip jatyr
ASTANA. QazAqparat - Astana kúni merekesine oraı qazirgi zamanǵy mýzyka festıvali ashyldy. Atalǵan shara qalamyzda tuńǵysh ret uıymdastyrylyp jatyr.
Qazirgi zamanǵy mýzyka festıvali úsh kún boıy «Astana Arena» stadıony aldyndaǵy alańda ótip, úzdik dıdjeıler, rok toptar men hıp-hop oryndaýshylar óner kórsetedi.
Festıval ashyq alańda keshki saǵat 20.00-den túngi 01.00 deıin ótedi. Sharany kez-kelgen adam tamashalaı alady.
Qazirgi zamanǵy mýzykasy festıvali búgin rok-festıvalmen ashylady. Kontsert 20 jyldan beri kórermen kóńilinen shyǵyp júrgen Aleksandr Vasılev jetekshilik etken tanymal «Splın» tobynyń tabynýshylary úshin keremet tartý bolady. Alǵashqy keshtiń taǵy bir mańyzdy qonaǵy reseılik aǵaıyndy Krıstovskıılerdiń «Uma2rmaN» toby. Sondaı-aq, festıval baǵdarlamasynda «Evrovıdenıe» baıqaýynyń qamqorlyǵymen ótetin vokaldyq ınternet-konkýrsta úshinshi oryn alǵan almatylyq «The Madisson» toby da bar. Budan basqa, astanalyq «Zerkalo» toby men almatylyq «Motoroller» toptary da óner kórsetedi.
Mýzykalyq marafondy kóshe mádenıetiniń ókilderi - hıp-hop jáne rep oryndaýshylar jalǵastyrady. «Astana Arena» aldyndaǵy alańda qazaqstandyq jáne reseılik ártisterdiń úzdik shyǵarmalary oryndalady. Hıp-hop mýzyka keshine Ner, «Da Gudda Jazz», Big Som, Jah Khalib, «Pıtstsa» toby, «Krec» toby jáne Karandash qatysady. Sonymen qatar, Reseıde hıp-hop janryn alǵash ashqan «Kasta» toby da bolady.
Úsh kúndik mýzykalyq shoý DJ festıvalmen aıaqtalady. Astanada álemniń eń áıgili dıdjeıleri óner kórsetedi. Besinshi shildede «Astana Arena» aldyndaǵy alańda DJ Fara, DJ Baur, DJ Nejtrino, sonymen qatar, keshtiń basty qonaqtary - DJ Smash jáne DJ Alex Gaudino elektrondy mýzykanyń álemge tanymal úlgilerin kópshilik nazaryna usynady.
