Astanada tuńǵysh ret sadaq atýdan Qazaqstan birinshiligi ótedi

ASTANA. QazAqparat -  Astanada tuńǵysh ret sadaq atýdan Qazaqstan chempıonaty ótedi, dep habarlaıdy QazAqparat tilshisi. 

UOK-niń málimetinshe 27 maýsymǵa deıin jalǵasatyn doda elorda tórindegi «Jas Batyr» sporttyq kesheniniń bazasynda uıymdastyrylady.

Jarysqa 9 komanda, naqtyraq aıtsaq, Almaty, Aqmola, Qaraǵandy, Pavlodar oblystary, OQO, BQO jáne Aqtóbe, Astana, Almaty qalalarynan kelgen sportshylar qatysady. Elordamyzda tuńǵysh ret ótkeli otyrǵan chempıonattyń ashylý saltanaty 22 maýsym kúni saǵat 12:00-ge josparlanǵan.

Sadaq atýdan Qazaqstan quramasynyń jetekshisi Edil Temirbekovtiń aıtýynsha, el chempıonatynan soń Azııa oıyndaryna qatysatyn komanda jasaqtalyp, Jazǵy Azıadaǵa tyńǵylyqty daıyndyq bastalady.