Astanada tuńǵysh ret kekýshınkaı karate-dodan Azııanyń ashyq chempıonaty ótedi
ASTANA. Qazannyń 15-i. QazAqparat /Jasulan Amanbaıuly/ - Astanada erteń, qazannyń 16-synda erler, áıelder jáne jasóspirimder arasynda kekýshınkaı karate-dodan Azııanyń XII ashyq chempıonaty bastalady.
«Dáýlet» sport kombınatynda Aýǵanstan, Bangladesh, Japonııa, Iran, Qytaı, Kýáıt, Lıvan, Nepal, Sırııa, Pákistan, Sıngapýr, Shrı-Lanka, Úndistan, Fılıppın, Reseı, Ózbekstan, Qyrǵyzstan elderiniń karateshileri saıysqa túsedi.
Búgin elordaǵa qurmetti qonaqtar qatarynda Búkilálemdik kekýshınkaı-kan karate-do uıymynyń Prezıdenti, 8 dan men qara belbeý ıegeri Shokeı Kancha Matsýı ushyp keldi.
«Azııa birinshiliginiń osy elde uıymdastyrylýy Qazaqstan úshin de, biz úshin de óte jaǵymdy oqıǵa»,-deıdi K. Matsýı búgin Astanada ótken baspasóz máslıhatynda.
«Karate-do kekýshınkaı jekpe-jek sporty retinde tek qana adamnyń dene shymyrlyǵyn damytýǵa ǵana emes, sonymen qatar onyń rýhanı múmkinshilikterin arttyrýǵa baǵyttalǵan. Sondyqtan biz Qazaqstan jattyqtyrýshylaryna kekýshınkaıdy rýhanı dúnıeniń úılesimdigin kózdeıtin jekpe-jek óneri retinde taratý kerektigin nasıhattaımyz»,- dep aıaqtady sózin K. Matsýı.
Qazaqstandyq kıokýshınkaı karate-do federatsııasynyń prezıdenti Álimjan Moldaǵalıevtiń aıtýynsha, jalpy bul dúbirli dodada el namysyn ulttyq qurama sapyndaǵy 35 sportshy qorǵamaq.
Olardyń qatarynda jastar arasyndaǵy Álem chempıony Azamat Takenov pen Azııa chempıonatynyń júldegeri Aıan Mahanov bar.
