Astanada tuńǵysh ret konkýrdan Álem kýbogy Eýrazııa lıgasynyń fınaly ótip jatyr
ASTANA. KAZINFORM — Elordadaǵy «Arǵymaq» at sporty kesheninde konkýrdan Álem kýbogy Eýrazııa lıgasynyń (FEI World Cup) fınaly bastaldy. Qazaqstan tarıhynda alǵash ret uıymdastyrylyp otyrǵan bedeldi dodada Shvetsııanyń Stokgolm qalasynda ótetin Úlken fınaldyń úsh joldamasy sarapqa salynady.
Jarys qarsańynda ótken baspasóz máslıhatynda QR At sporty federatsııasy prezıdentiniń keńesshisi ári FEI tehnıkalyq delegaty Sergeı Býıkevıch, tóreshiler alqasynyń prezıdenti Álı Kýchýk (Túrkııa), kýrs-dızaıner Mýrat Batýr (Túrkııa) jáne ulttyq quramalardyń kóshbasshylary týrnırdiń mańyzdylyǵy men daıyndyq barysyn baıandady.
Qurmetti qonaqtar men basty ıntrıga
Týrnırdiń qurmetti qonaqtary retinde Halyqaralyq at sporty federatsııasynyń (FEI) prezıdenti, HOK bıýrosynyń múshesi Ingmar De Vos pen FEI birinshi vıtse-prezıdenti Mark Samýel (Kanada) arnaıy keledi.
Eýrazııa lıgasyna 11 memleket kirse, sonyń ishinde irikteýden ótken 5 eldiń úzdik shabandozdary Astanada bas qosty. El namysyn Nurıla Turysbekova, Oleg Sokolenko, Raısa Sokolenko jáne Ksenııa Batalova qorǵaıdy. Qurama kóshbasshylarynyń biri Nurıla Turysbekovanyń aıtýynsha, Eýropada 3–4 aı boıy oqý-jattyǵý jıyndaryn ótkizgen sportshylar óz jankúıerleri aldynda lıtsenzııa jeńip alýǵa daıyn.
Shyǵys Eýropa aımaǵynan reseılik tájirıbeli shabandoz Darıa Samohına óz komandasymen keldi. Kaspıı-Kavkaz lıgasy atynan Grýzııanyń aldyńǵy qatarly shabandozy Shalva Gachechıladzege qatysady. Sondaı-aq Ózbekstan jáne Qyrǵyzstan quramalary óner kórsetýge daıyn.
— Qazaqstannyń at sporty tarıhynda tuńǵysh ret Eýrazııa lıgasynyń fınalyn ótkizemiz. Búgin biz elimizdiń halyqaralyq arenadaǵy bolashaǵyn birge qalyptastyryp jatyrmyz. Básekelestik óte joǵary, sondyqtan Stokgolmge beriletin joldamalardyń taǵdyry sońǵy sátke deıin sheshilmeıdi. Qazirgi tańda at sportynda tulpardyń quqyǵy men densaýlyǵy bárinen joǵary qoıylady, kez kelgen daýly jaǵdaı jylqynyń múddesine saı sheshiledi, — dedi Sergeı Býıkevıch.
Sonymen qatar Sergeı Býıkevıch Qazaqstannyń aldaǵy iri josparymen bólisti. Elimiz kelesi jyldyń mamyr aıynyń sońynda Astanada Álem kýbogy kezeńi aıasynda Olımpıada oıyndaryna lıtsenzııa beretin arnaıy kvalıfıkatsııalyq týrnır (Special Event) ótkizýge ótinim bergen.
— Básekelestik óte joǵary: Olımpıadalyq «S» tobyna kiretin 29 memlekettiń ishinen bul týrnırdi ótkizýge Chehııa, Rýmynııa, Vengrııa, Reseı, Belarýs jáne Qazaqstan ótinim berip otyr. At sportynyń úsh olımpıadalyq túri bolsa, sonyń ishinde dál osy konkýrdy ótkizýge bári talasady. 3–5 jeltoqsanda Qytaıda ótetin Bas assambleıadaǵy talqylaýǵa arnap saqtap otyrǵan «qupııa kiltterimiz» bar. Eger osy quqyqty jeńip alsaq, Astanaǵa 29 eldiń eń úzdik shabandozdary keledi. Týrnırde Olımpıadaǵa nebári eki joldama sarapqa salynsa da, bul bizge álemdik kóshbasshylarmen teń dárejede básekelesip, baǵa jetpes tájirıbe jınaýǵa jáne Qazaqstandy joǵary deńgeıde tanytýǵa múmkindik beredi, — dedi.
Otandyq sportty damytý jáne tóreshiler baǵasy
Tóreshiler alqasynyń prezıdenti Álı Kýchýk týrnırdiń uıymdastyrylý deńgeıine joǵary baǵa berip, sheteldik tájirıbemen qatar eldegi jankúıerler qoldaýy men ishki jarystardy damytýdyń mańyzdylyǵyna toqtaldy.
— Álemdi aralap, barlyq júldeni jeńip alýǵa bolady, biraq óz elińde jankúıerlerdiń qoldaýyn sezinbeseń, ózińdi jalǵyz sezinesiń. Arqa súıer myqty tiregi men óz eliniń qoldaýy bar sportshyny eshbir jaǵdaıda jeńý múmkin emes. Sondaı-aq Eýropaǵa barsaq boldy, úzdik bapker tabylyp, bári birden sheshiledi dep oılamaý kerek, negizgi irgetas óz elimizde qalanýy tıis, — dep atap ótti tóreshiler alqasynyń prezıdenti.
Jarys baǵdarlamasy jáne jabyq manej ereksheligi
Veterınarlyq tekseris qorytyndysy boıynsha (komıssııa tóraǵasy — Mıhaıl Sýchkov) barlyq tulpar jarysqa jiberildi.
Kýrs-dızaıner Mýrat Batýrdyń aıtýynsha, maýsym boıy ashyq alańdarda óner kórsetken tulparlar úshin jabyq manejde sekirý qosymsha synaq bolmaq.
— Jabyq manej qatysýshylar úshin árdaıym qosymsha qıyndyq týdyrady: sezimtal tulparlar jaryqtan, ekrandardan jáne jabyq keńistikten úrkýi múmkin. Meniń basty mindetim — alystan kelgen attarǵa da, jergilikti tulparlarǵa da teń jaǵdaı jasaý. Sondyqtan birinshi kúni jeńildetilgen marshrýttan bastap, fınalǵa qaraı básekeni shıelenistire túsemiz. FEI reglamenti boıynsha keminde úsh bıik kedergi bolady, — dedi kýrs-dızaıner.
Sonymen qatar baspasóz máslıhaty barysynda sheteldik shabandozdar Qazaqstannyń qonaqjaılyǵy men Astananyń ádemiligin atap ótip, «Arǵymaq» kesheniniń daıyndyq deńgeıine erekshe iltıpat bildirdi.
Astanaǵa komandasymen ekinshi ret kelip otyrǵan reseılik shabandoz Darıa Samohına joldyń uzaq bolǵanyn, degenmen tulparlardyń jarysqa deıin demalyp úlgeretinin aıtyp, elordanyń sulýlyǵy men halqynyń meıirimdiligin erekshe atap ótti. Ózbekstan quramasynyń kóshbasshysy Bekzod Qurbanov Eýropada daıyndalǵan tulparlaryn osy fınalǵa arnaıy aldyrǵanyn jetkizdi. Onyń aıtýynsha, jarystyń ekinshi otanyndaı bolyp ketken Qazaqstanda ótýi komanda úshin óte yńǵaıly ári olar dodaǵa tolyq daıyn. Al baýyrlas elge kóp jyldan beri jıi kelip turatyn Qyrǵyzstan quramasynyń bas bapkeri Rınat Galımov bıylǵy básekege jas shabandozdar men jas tulparlardan jasaqtalǵan quramdy ákelgenin málimdedi.
Aıta keteıik, baıqaryqty básekege Qazaqstan, Ózbekstan, Qyrǵyzstan, Belarýs, Iran, Ázerbaıjan, Armenııa, Grýzııa, Moldova, Reseı jáne Túrikmenstan elinen kelgen sportshylar qatysyp jatyr.