Astanada «QAITADAN» atty fılmniń jabyq kórsetilimi ótti
ASTANA. KAZINFORM – Astanada «QAITADAN» fılminiń jabyq kórsetilimi ótti. Týyndy – rejısser Dýman Erkimbektiń alǵashqy tolyqmetrajdy jumysy. Bul – Qazaqstanda katastrofa janrynda túsirilgen tuńǵysh kórkem fılm. Bul týraly Mádenıet jáne aqparat mınıstrligi málim etti.
— Kartınada ózimshil qala balasy Raýannyń oqıǵasy baıandalady. Mańyzdy sporttyq jarys aldynda ata-anasynyń qalaýymen aýylǵa kelgen ol ýaqyt tuzaǵyna tap bolady. Onyń ómirindegi oqıǵalar qaıtalana beredi. Tyǵyryqtan shyǵýǵa tyrysqan Raýan joıqyn apatqa kýá bolyp, ómirge degen kózqarasy túbegeıli ózgeredi, — delingen habarlamada.
Іs-shara barysynda QR Mádenıet jáne aqparat mınıstrligi Mádenıet komıtetiniń tóraǵasy Erlan Dákenov fılm tereń oıǵa jeteleıtin fılosofııalyq oqıǵa ekenin atap ótti. Týyndyda urpaqtar arasyndaǵy sabaqtastyq, qatelik pen keshirim sekildi mańyzdy taqyryptar qozǵalatynyn tilge tıek etti.
Bul joba 2023 jyly pıtchıngte jeńiske jetip, QR Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen júzege asty.
Aıta keteıik, sońǵy alty jyl ishinde ortalyqtyń qoldaýymen 118 otandyq fılm túsirilgen. Qazaqstandyq týyndylar 280-nen astam halyqaralyq festıvalge qatysyp, 157 júldege ıe boldy. Bul nátıje ulttyq kınonyń qarqyndy damyp kele jatqanyn kórsetedi.
«QAITADAN» fılmi qyrkúıekten bastap elimizdiń kınoteatrlarynda kórsetilip, qalyń kórermenge jol tartady.
Buǵan deıin habarlanǵandaı, ulttyq kınony qoldaýǵa bólinetin qarjyǵa shekteý engizildi.