Astanada túngi uıqyny «buzǵandar» jazalanady
ASTANA. QazAqparat - Turǵyndar tarapynan túngi ýaqytta qurylys jumystary júrgiziletindigi jóninde shaǵymdardyń kóbeıýine baılanysty elorda ákimdigi Astana qalasynyń ІІD-men birlesip reıd júrgizdi, dep habarlaıdy ákimdiktiń baspasóz qyzmeti.
Sońǵy ýaqytta «turǵyndardyń tynyshtyǵyn buzý (qurylys jumystary júrgizilýde)» baǵytyna erekshe nazar aýdarylýda. Qala ákiminiń tapsyrmasynan keıin sońǵy eki táýlikte saǵat 23:00 -den 07:00-ge deıin 34 ótinish qabyldandy.
Qońyraýlar «109 kezekshilik qyzmeti» MM túsedi. Qabyldanǵan aqparatty saraptaý tártibi: ótinish, ótinish bildirýshiniń meken jaıy, jeke málimetteri, odan keıin qurylys nasanynnyń ornalasýy týraly aqparat «102» pýltine, qurylys basqarmasyna memlekettik sáýlet-qurylys baqylaýyna jáne aýdandyq ákimdikterge (aýdanǵa baılanysty) jiberiledi. Jumys merzimi - ótinishti 2 saǵat ishinde qaraý. Óz kezeginde «109 kezekshilik qyzmeti» málimetterdi 300 baǵyt boıynsha júrgizedi. Sonymen qatar, ótinish bildirýshiler óz shaǵymdaryn Smart Astana qosymshasy, sondaı-aq «109 kezekshilik qyzmetiniń» áleýmettik jelilerdegi «Feısbýk», «Instagram», «Tvıter» resmı paraqshalary arqyly baǵyttaı alady.
Senbiden jeksenbige qaraǵan túni 23:00-de «Komfort taýn» TK turǵynynan qońyraý kelip tústi. Shaǵymdanýshy 38 («Saranda» TK) aýdanynda qurylys jumystary júrgizilip jatqanyn jáne qurylystyń dybysy jaqyn mańdaǵy keshen turǵyndarynyń tún tynyshtyǵyn buzatyndyǵyn jetkizdi.
«Men «Komfort taýn» TK, 3 kezek, 25 kóshesi, 38 úı meken-jaıynda turamyn. Osy nysan mańynda únemi qurylys jumystary júrgiziledi, uıqymyzdy buzady. Meniń ózim 5-6 ret polıtsııa shaqyrdym», - deıdi turǵyn.
«Jaz mezgilinde qurylys nysandary boıynsha óte kóptegen ótinish-shaǵymdar kelip túsedi. Eger quqyq buzýshylyq anyqtalsa, onda biz ÁQK-niń 437 babyna sáıkes sol jerde ákimshilik hattama toltyramyz. Mundaı quqyq buzýshylyq úshin jeke tulǵalarǵa-5 AEK, shaǵyn kásipkerlik sýbektilerine-10 AEK, orta kásipkerlik úshin -15 AEK, iri kásipkerlikke-50 AEK aıyppul qarastyrylǵan», - deıdi ýchastkelik ınspektor, polıtsııa aǵa leıtenanty Madııar Dúısepbekov.
