Astanada «Túngi sot» jumysyn bastady
ASTANA. QazAqparat - 5 maýsymnan bastap Astana qalasynyń mamandandyrylyǵan aýdanaralyq sotynda «Túngi sot» pılottyq jobasy iske qosyldy, dep habarlaıdy QazAqparat qalalyq sottyń baspasóz qyzmetine silteme jasap.
Qalalyq sottyń baspasóz qyzmetinde «Túngi sotta» keshki 18 saǵat 30 mınýttan bastap túngi 22.00-ge deıin jol-kólik erejesin buzýǵa qatysty ákimshilik ister qarastyrylatynyn habarlady.
«Alǵashqy kúni QR ÁQK 601-babynyń 1 bóligine sáıkes (Jol belgilerinde kórsetilgen talaptardy nemese joldyń júrý bóligindegi belgini saqtamaý saldarynan kólikterdiń buzylýy»)13 materıal qarastyryldy. Keshe 16 is talqyǵa salyndy. Eki kún ishinde jalpy 26 ákimshilik is qaralyp úlgerdi», -dedi baspasóz qyzmetiniń ókilderi.
«Túngi sot» jobasynyń erejelerine sáıkes, jol-kólik oqıǵasy qatysýshylary kelisimimen joǵaryda kórsetilgen ýaqyt ishinde quzyrly organ qyzmetkeri ákimshilik quqyqbuzýshylyq týraly hattamaǵa sotqa merzimi kórsetilgen (jol-kólik oqıǵasy oryn alǵan ýaqyttan 3 táýlikten aspaýy tıis) shaqyrtý alý týraly talon toltyrady.
Eger jol apatynyń qatysýshysy kinásin moıyndamaı, prokýrordyń, qorǵaýshynyń, aýdarmashynyń, sarapshynyń, mamannyń nemese basqa da múddeli tulǵalardyń aralasýy kerek bolsa jáne qosymsha dálelderdi usyný men zertteýdi qajet etken jaǵdaıda sýdıa sot otyrysynyń qaraýyn keıinge qaldyrady.
«Túngi sot» pılottyq jobasynyń aıasynda Astana qalalyq soty men Іshki ister departamenti yntymaqtastyq týraly memorandýmǵa qol qoıdy.
Memorandým azamattardy yńǵaıly ýaqytta quqyqtarymen jáne tıimdi ákimshilik sot isin júrgizýmen qamtamasyz etý týraly taraptardyń yntymaqtastyq aıasyn belgileıdi.
