Astanada túngi klýbta jastar arasynda janjal týyndap, 18 jastaǵy jigit mert boldy

ASTANA. KAZINFORM – Qasaqana aýyr dene jaraqatyn salý saldarynan jábirlenýshiniń qaza bolýyna baılanysty sotqa deıingi tergep-tekserý bastaldy. Polıtsııa qyzmetkerleri eki kúdiktini ustap, ýaqytsha ustaý ızolıatoryna qamady.

– Aldyn ala málimetke sáıkes, túngi oıyn-saýyq oryndarynyń biriniń mańynda jastar arasynda janjal shyǵyp, ol tóbeleske ulasqan. Sonyń saldarynan 18 jastaǵy azamat alǵan jaraqattarynan kóz jumdy. Qazirgi ýaqytta oqıǵanyń mán-jaıy anyqtalyp, tergeý amaldary júrgizilip jatyr, – delingen Astana qalasynyń polıtsııa departamenti taratqan habarlamada.

Sonymen qatar vedomstvo azamattardy oıyn-saýyq mekemelerine barǵan kezde qoǵamdyq tártip talaptaryn saqtaýǵa jáne janjaldan aýlaq bolýǵa shaqyrdy. 

– Zańǵa qaıshy kez kelgen áreket úshin qoldanystaǵy zańnamaǵa sáıkes jaýapkershilik kózdelgen, – dedi polıtsııa departamenti.

Buǵan deıin Almatynyń Bostandyq aýdanyndaǵy oıyn-saýyq oryndarynyń biriniń mańynda birneshe adamnyń bir er azamatty soqqyǵa jyqqanyn jazǵanbyz. 

Sonymen qatar Oralda kolledjdiń eki stýdenti tóbelesip, aýrýhanaǵa túsken edi.

Eske salsaq, Shymkent qalasyndaǵy saýda-oıyn-saýyq ortalyqtarynyń biriniń mańynda bolǵan jasóspirimder arasyndaǵy tóbeleste qarý qoldanylǵan bolýy múmkin degen qaýeset qylmystyq is qozǵaýǵa sebep boldy.

Qaqtyǵysqa qatysqan barlyq tulǵalar ustaldy.