Astanada túngi aýysymda qar kúreýge 1 200-den asa arnaıy tehnıka jumyldyryldy
ASTANA. KAZINFORM — Elordada qar kúreý jumysy táýlik boıy jalǵasady. Qalanyń kommýnaldyq qyzmetteri kúndiz jáne túnde birneshe aýysymmen jumys istep jatyr, dep habarlaıdy Astana ákimdiginiń resmı saıty.
Kúndizgi aýysym barysynda qaladan 2 527 reıs arqyly shamamen 33 myń tekshe metr qar shyǵaryldy.
— 23 jeltoqsanǵa qaraǵan túni qar tazalaý jumysyna 449 jol jumysshysy men 1 608 arnaıy tehnıka jumyldyrylady. Jalpy qys maýsymy bastalǵaly beri qaladan qar polıgondaryna 72 847 júk kóligi reısimen 941 myń tekshe metrden astam qar shyǵaryldy, — delingen habarlamada.
Aldymen negizgi kósheler men qoǵamdyq kólik baǵyttary tazalanady. Odan keıin qozǵalys qarqyny ortasha aýmaqtar — aýlalar, alańdar, trotýarlar men aıaldamalar tazartylady. Qala turǵyndarynyń qaýipsiz júrýin qamtamasyz etý úshin joldarǵa, trotýarlar men kóshelerge tehnıkalyq tuz sebiledi.
Sonymen qatar, aýla aýmaqtarynyń tazalyǵyn qamtamasyz etý PIK pen MIB-tiń mindeti ekeni eske salynady. Olar turǵyndardyń qaýipsizdigi men qolaılylyǵy úshin aýlalardy qar men kóktaıǵaqtan ýaqytyly tazalaýy tıis.
Astana ákimdigi qala turǵyndary men qonaqtaryn qaýipsizdik erejelerin saqtaýǵa, joldar men trotýarlarda barynsha muqııat bolýǵa, sondaı-aq qolaısyz aýa raıy jaǵdaıynda alys jolǵa shyqpaýǵa shaqyrady.
Budan buryn Astana ákimi Jeńis Qasymbek qardyń az jaýýyna baılanysty qar tazalaý jumystaryna jumsalatyn qarajattyń únemdelgenin aıtty.