Astanada túnde ózen mańynda sarbazdar 4 jastaǵy balany taýyp aldy
ASTANA. QazAqparat - №5573 áskerı bóliminiń sarbazdary keshki jáne túngi ýaqytta joǵalyp ketken birneshe balany taýyp aldy, dep habarlaıdy QR Ulttyq Ulannyń baspasóz qyzmeti.
21 maýsym kúni saǵat 22-20-da áskerı kezekshilik bastyǵy B.Nurádilov pen qatardaǵy jaýyngerler Janserik Aıtýǵan men Ádilet Shirkeı Esil ózeniniń jaǵalaýynda 4 jas shamasyndaǵy balany kórgen. Ol jalǵyz bolǵan jáne qaıda bararyn bilmeı turǵan. Sarbazdar oǵan kelip, ata-anasynyń qaıda ekenin suraǵan. Al bala bolsa, óziniń adasyp qalyp, anasyn tappaı júrgenin aıtqan. Balanyń anasyn izdestirgen sarbazdar 20 mınýttan soń ony tapqan.
Osydan buryn saǵat 18-30-dar shamasynda qoǵamdyq tártipti qadaǵalaý barysynda ásker kezekshiliktegi Bekjan Tóleýhan men qatardaǵy jaýyngerler Erbolat Tólegenov pen Myrza Jubathanov Esil ózeniniń jaǵalaýynda jylap turǵan eki balany keziktirgen. Balalardan surastyra kele sarbazdar olardyń ata-analaryn joǵaltyp alyp, ne isterlerin bilmeı turǵanyn anyqtaǵan. Balalardy jetektep ishki ister bólimine bet alǵan sarbazdar jol boıy balalardyń ata-analaryn keziktirgen. Balalar ata-analaryna aman-esen tabystaldy.
Osyǵan deıin habarlanǵanyndaı, demalys kúnderi Nura-Esil kanalynda 5 bala sýǵa batyp bara jatqan. Kýágerlerdiń biri balalardyń tek bireýin ǵana qutqaryp qala aldy. Bala aýrýhanada jatyr.
