Astanada túnde loýndj-barda qorqor shekkender anyqtaldy

NUR-SULTAN. QazAqparat - Elordada polıtsııa qyzmetkerleri, epıdemıologtar, eriktiler men jergilikti atqarýshy organdardyń ókilderinen jasaqtalǵan mobıldi top kásipkerlik sýbektileri tarapynan 79 zań buzýshylyqty anyqtady. Olar demalys kúnderi karantın sharalaryn buza otyryp, tyıym salynǵan ýaqytta jumys istegen, dep habarlaıdy QazAqparat tilshisi.

Máselen, Nur-Sultan qalalyq Polıtsııa departamentiniń málimetinshe, demalysta tún ishinde jumys istegen «Vınnı Pyh» loýndj-bary kelýsherge qorqor tartý qyzmetin usynǵan. Mekemede Bas memlekettik sanıtar dárigerdiń normalaryn buza otyryp, bir ústelde araqashyqtyq saqtamaı kóńil kótergen 20 klıent anyqtalǵan.

«Kelýshilerge qatysty QR Ákimshilik quqyq buzýshylyq kodeksiniń 441-babymen 3 ákimshilik hattama toltyryldy. Al bar ákimshisi kalıan shegýshilerge shara qabyldamaǵany úshin ákimshilik jaýapkershilikke tartyldy jáne 20 aılyq eseptik kórsetkish kóleminde aıyppul salyndy», - delingen taratylǵan aqparatta.

Sondaı-aq barlyq zań buzýshylyqtarǵa qatysty jınalǵan materıldar QR Ákimshilik quqyq buzýshylyq týraly kodekstiń 425-babymen ákimshilik jaýapkershilikke tartý úshin qalalyq taýarlar men kórsetiletin qyzmetterdiń sapasy men qaýipsizdigin baqylaý departamentine jiberildi.

«Nur-Sultan qalalyq Polıtsııa departamenti azamattardy qoǵamdyq oryndarda jaýapkershilikpen júrip-turýǵa jáne sanıtarlyq normalardy saqtaýǵa shaqyrady. Koronavırýstyń taralýyna jol bermeý maqsatynda polıtsııa qyzmetkerleri turǵyndarmen karantın rejımin saqtaý jáne jeke qorǵanys zattaryn qoldaný qajettigi týraly aldyn alý jumystaryn júrgizedi», - dep atap ótedi departamentten.