Astanada túnde bolǵan órtten eki adam, onyń ishinde 12 jastaǵy bala ajal qushty
ASTANA. 11 jeltoqsan. QazAqparat - Astanadaǵy Kóktal shaǵynaýdanynda búgin túnde jekemenshik úıdiń aýmaǵynda baspanaǵa beıimdetilgen ýaqytsha qurylystyń shatyry órtendi, dep habarlady QR TJM.
Jalyn 30 sharshy metrdi sharpydy.
Órt 1 saǵattan keıin sóndirildi. Ony aýyzdyqtaýǵa QR TJM Astana qalasy boıynsha TJD órtke qarsy qyzmetiniń 25 adamy men 3 tehnıkasy, QR TJM «AMQ» MM-niń 3 adamy men 1 tehnıkasy jumyldyryldy.
Órt ornynda 36 jastaǵy áıel men 12 jastaǵy balanyń máıitteri anyqtaldy. 43 jastaǵy er adam, 18 jasar jas jigit pen 5 jáne 9 jasar balalar kúıik shalý belgilerimen aýrýhanaǵa jetkizildi.
Almaty qalasynyń Áıgerim-2 shaǵynaýdanynda keshe kúndiz jekemenshik úıdiń jáne jekemenshik úıdiń aýmaǵyndaǵy ýaqytsha qurylystyń tóbesi órtendi. Jalyn sharpyǵan aýmaq 200 sharshy metrdi qurady. Órt 2,5 saǵattan keıin sóndirildi. Tilsiz jaýdy aýyzdyqtaýǵa QR TJM Almaty qalasy boıynsha TJD órtke qarsy qyzmetiniń 18 adamy men 7 tehnıkasy jumyldyryldy. Órt saldarynan eki áıel men 6 jastaǵy bala túrli deńgeıdegi kúıik shalý belgilerimen aýrýhanaǵa jetkizildi.
