Astanada tumaý men JRVI-ge qarsy vaktsınatsııa júrip jatyr: kimder tegin ala alady
ASTANA. KAZINFORM — Astana turǵyndary tumaý men JRVI-ge qarsy vaktsınatsııany tegin ala alady. Ekpe saldyrý 6 aıdan bastap balalarǵa, jasóspirimderge, barlyq jastaǵy eresekterge, sondaı-aq 16-dan 37 aptalyq merzim aralyǵynda júkti áıelderge qoljetimdi.
Astana ákimdiginiń málimetinshe, vaktsına alý úshin ýchaskelik dárigerge jazylmaı-aq, qabyldaý ýaqytynda barýǵa bolady. Dıspanserlik esepte turǵan egde jastaǵy adamdar men sozylmaly aýrýlary bar naýqastardyń vaktsınatsııadan ótýi asa mańyzdy.
Tumaý men JRVI-diń aldyn alý úshin mamandar kelesi sharalardy ustanýǵa keńes beredi:
• maska taǵý jáne antıseptık qoldaný;
• kóp adam jınalatyn oryndarǵa barýdy shekteý;
• bólmelerdi jıi jeldetip, dymqyl tazalyq júrgizý;
• aýyryp júrgen adamdarmen qarym-qatynasty azaıtý;
• durys jáne teńgerimdi tamaqtaný;
• aýrý belgileri paıda bolǵanda dereý dárigerge qaralý.
Qazirgi tańda ekpeni 80 264 adam (55,3%) saldyrdy. Medıtsınalyq qyzmetkerler de ózderin jáne naýqastaryn qorǵaý maqsatynda vaktsınatsııadan ótip jatyr.
Qosymsha aqparatty emhananyń tirkeý bóliminen ala alasyzdar.
Aıta ketelik elimizde 240 myńnan astam adam onkologııa boıynsha esepte tur.
