Bıshimbaevtyń anasyn 1 mln dollarǵa jýyq somaǵa aldaǵan týysy sottaldy

ASTANA. KAZINFORM – Astana qalasynyń Qylmystyq ister jónindegi aýdanaralyq sotynda asa iri mólsherde alaıaqtyq jasady dep aıyptalǵan áıelge qatysty qylmystyq is qaraldy.

Іs materıaldaryna sáıkes, 2023 jyldyń sońynda Bekzat Kemelova ulynyń qylmystyq isine qatysty kúızeliske túsken týysy Almıra Nurlybekovadan iri kólemde qarjy alǵan. Sot anyqtaǵandaı, aıyptalýshy azamattyq nekedegi áıelin óltirdi degen kúdikpen qamaýda otyrǵan Qýandyq Bıshimbaevty tutqyndaý men tárkileýden saqtaımyn dep anasynyń 990 myń dollar qarjysyn ıemdengen.

Keıin ony óz qalaýynsha jumsap, jábirlenýshige asa iri mólsherde materıaldyq zalal keltirgen.

Prokýror sottan Kemelovanyń múlkin tárkileı otyryp, 6 jyl 8 aı merzimge bas bostandyǵynan aıyrý jazasyn taǵaıyndaýdy surady. Sottalýshy óz kinásin moıyndamady. Jábirlenýshi tarap barynsha qatań jaza taǵaıyndaýdy jáne keltirilgen zalaldy tolyq kólemde óndirýdi talap etti.

- QR QK-niń 190-baby 4-bóligi 2-tarmaǵynyń sanktsııasy 5 jyldan 10 jylǵa deıin bas bostandyǵynan aıyrý jazasyn kózdeıdi.

Sot jeńildetetin mán-jaı retinde sottalýshynyń kámeletke tolmaǵan balasy baryn tanydy. Aýyrlatatyn mán-jaılar anyqtalmaǵan.

Sot úkimimen Kemelovaǵa múlkin tárkileı otyryp, 6 jyl 8 aı merzimge bas bostandyǵynan aıyrý jazasy taǵaıyndaldy. Sonymen qatar QR QK-niń 74-baby 1-bóligine sáıkes, sottalýshynyń kámeletke tolmaǵan balasynyń bolýyna baılanysty jazany óteý bir jyl merzimge keıinge qaldyryldy, - delingen Astana sottarynyń aqparatynda.

Jábirlenýshiniń azamattyq talaby tolyq kólemde qanaǵattandyryldy.

Úkim zańdy kúshine engen joq.

Aıta keteıik, buǵan deıin Qýandyq Bıshimbaevtyń anasy týysymen sottasyp jatqany habarlanǵan bolatyn.

Sot barysynda Bıshimbaevtyń anasy 1 mln dollarǵa jýyq aqshany qaıdan alǵanyn túsindirdi.