Astanada týberkýlezge shaldyqqandardyń 25% tabysy kúnkóris deńgeıinen tómen
ASTANA. QazAqparat - Astanada týberkýlezge shaldyqqan árbir tórtinshi adamnyń tabysy kúnkóris deńgeıinen tómen. Bul týraly Qoǵamdyq densaýlyq saqtaý basqarmasynyń basshysy Qamaljan Nádirov máslıhat otyrysynda aıtty, dep habarlaıdy QazAqparat Elorda Info saıtyna silteme jasap.
«Byltyrǵy jyly týberkýlez aýrýyna shaldyqqandardyń 67% ekonomıkalyq belsendi jastaǵylar bolyp shyqty. Onyń ishinde aýrý juqtyrǵandardyń árbir besinshisi Astanaǵa ótken jyly kelgender, sondaı-aq árbir ekinshisiniń turaqty jumysy joq, árbir tórtinshisiniń tabysy kúnkóris deńgeıinen tómen. Sonymen qatar, olardyń jartysynan astamynda jeke baspanalary joq, ıaǵnı jaldamaly úıde turady», - dedi ol.
Osylaısha, týberkýlezben aýyratyndardyń 76,6% turmystyq jaǵdaıyn tómen ekendigi anyqtaldy. Flıýro tekserýdiń nátıjesi boıynsha, atalǵan toptaǵylar arasynda týberkýlez qaýpiniń joǵarylyǵy baıqalyp otyr.
«Jyl saıynǵy tekserý anyqtaǵandaı, 10 myń adamnyń arasynda týberkýlezge shaldyǵýdyń 7-9 jaǵdaıy anyqtalady. Al qaýipti toptaǵylar arasynda 10 myń adamnyń arasynda 27 jaǵdaı rastaldy. Bul, 2017 jylmen salystyrǵanda 2,3 esege kóp. Ótken jyldyń qorytyndysyna kelsek, týberkýlez boıynsha tekserilgen qaýipti toptardyń ishinde myń adamǵa shaqqanda 19,8% - buryn sottalǵandar, 17,6% - qańǵybastar, 4,9% AITV aýrýyna shaldyqqandar bolyp shyqty. Sol sııaqty ishimdikti jıi qoldanatyn jandar arasynda da týberkýlez qaýpi joǵary», - deıdi Q.Nádirov.
Odan bólek, qaýiptiligi joǵary topqa jatpaıtyndar arasynda, tekserilgen myń adamnyń 0,7-sinen atalǵan aýrý belgisi anyqtaldy.
Sondaı-aq atap ótilgendeı, Astanada atalmysh syrqattan kóz jumatyndar sany artty.
Bul úrdis týberkýlezge qarsy jańa dıspanserdiń ashylýymen elordaǵa ózge óńirlerden kóship kelýshiler sanynyń artýymen túsindirilýde.
«Ótken jyly 29 adam týberkýlezden kóz jumdy. Olardyń 10-y Astanaǵa 2-3 aıdyń kóleminde kóship kelgen. Aýrýhanaǵa jatqyzý kezinde jaǵdaılary aýyr bolǵan», - dep túsindirdi Kamaljan Nadyrov.
Degenmen, elordada sońǵy 10 jylda týberkýlezge shaldyǵý 4,5 esege azaıǵan. Máselen, 2008 jyly 100 myń adamǵa shaqqanda - 125,1, 2018 jyly 48,1 bolǵan. Ótken jyl ishinde syrqattaný 2017 jylmen salystyrǵanda 10,2 paıyzǵa tómendegen.
