Astanada týberkýlezge shaldyǵý tómendegen

Qazaqstanda týberkýlez boıynsha epıdemıologııalyq jaǵdaı turaqty. Sońǵy 10 jylda týberkýlezge shaldyǵý jaǵdaıy 2,4 esege tómendep, 2007 jyly 100 myń halyqqa shaqqanda 126,4-ti qurasa 2017 jyly 52,2 bolǵan. Ólim-jitim 100 myń halyqqa shaqqanda 6 esege tómendedi.

Qazirgi kúnde elimizde týberkýlezdi erte anyqtaý úshin dıagnostıkanyń halyqaralyq standarttarǵa sáıkes zamanaýı ádisteri qoldanylýda.

«Qazaqstanda týberkýlezdi birikken (ıntegratsııalanǵan) baqylaý strategııasy júzege asyrylýda. ıAǵnı, aınalasyndaǵy adamdarǵa qaýip týdyrmaıtyn patsıentter turǵylyqty meken-jaıy boıynsha emhanalarda ambýlatorııalyq em qabyldaıdy. 2017 jyldyń qorytyndysy boıynsha ambýlatorııalyq jaǵdaıda em qabyldaýdy bastaǵan týberkýlezge shaldyqqan naýqastardyń úles salmaǵy 25,1%-ǵa ósip, 40,3% qurady. Elimizde týberkýlezge shaldyqqan naýqastardy emdeý nátıjeliligi aıtarlyqtaı joǵary. Atap aıtsaq, elimiz boıynsha alǵash aıqyndalǵan týberkýlezge shaldyqqan naýqastardyń saýyǵyp ketýi 2016 jáne 2017 jyldarǵa sáıkes 86,9% jáne 87,0% qurady. Al, kóptegen dárilerge kónbeıtin týberkýlez jaǵdaıy ústimizdegi jyly jaqsaryp, 2016 jylǵy 74,8% kórsetkishine qarsy 78,2% qurady», - dedi Astana qalasy Týberkýlezge qarsy dıspanseriniń bas dárigeri Anna Tsepke ákimdikte ótken «Týberkýlezdiń bızneske yqpaly» taqyrybyna arnalǵan baspasóz máslıhatynda.

Elimizde 2016 jyldan bastap týberkýlezdi jańa dárilermen emdeýdiń qysqa merzimdi shemalary engizilýde. 2017 jyldyń jeltoqsan aıynda kóptegen dárilerge kónbeıtin jáne aýqymdy dárilerge kónbeıtin týberkýlezge shaldyqqan 373 patsıent jańa 5-top dárilermen emdeýge alynǵan (2016 j- 215; 2017 j.- 158). 

Sonymen qatar, Qazaqstanda týberkýlezdiń aldyn alý, dıagnostıkalaý men emdeý tegin jáne ol memleket esebinen júrgiziledi. Týberkýlezdi eńserip, aıyǵyp ketken adamdar oqyp, eńbek etip, dúnıege deni saý sábı ákelip, maǵynaly ómir súre alady. Olarǵa qorqynyshpen qarap, qoǵamnan oqshaýlaýdyń esh qajeti joq.