Astanada týberkýlezge qarsy kúres aılyǵy bastaldy
ASTANA. 23 aqpan. QazAqparat - 23 aqpannan bastap 23 naýryzǵa deıin Dúnıejúzilik týberkýlezge qarsy kúres kúnine oraı, aýrýdyń aldyn alý aılyǵy ótedi. Bul týraly astana.kz saıtyna Astana qalasynyń Salaýatty ómir saltyn qalyptastyrý ortalyǵynan habarlady.
Aılyq aıasynda Astana qalasynyń Densaýlyq saqtaý basqarmasy Salaýatty ómir saltyn qalyptastyrý ortalyǵymen jáne týberkýlezge qarsy dıspansermen birlesip, qalalyq emhanalarda ashyq esik kúnderin ótkizedi. Sonymen qatar, aýrýdy erte anyqtaý maqsatynda tegin keńes beriledi.
Bul salada júrgizilgen profılaktıkalyq jumystar óz nátıjesin berip jatqandyǵyn atap ótý kerek. Ótken jyly Astanada týberkýlezben aýyratyndar aıtarlyqtaı azaıdy. Astana qalasynyń Densaýlyq saqtaý basqarmasynyń derekterine sáıkes, 2012 jyly naýqastar sany 19,1 %-ǵa, al jalpy aýrýdyń ortasha kórsetkishi 100 myń adamǵa shaqqanda 83,2 %-ǵa azaıǵan, 2011 jyly - 102,9 % bolǵan. Búgingi kúni, Astanada 650-ge tarta naýqas ambýlatorlyq em qabyldaıdy.
