Astanada týberkýlezden ólim-jitim kórsetkishi 50 paıyzǵa tómendedi
ASTANA. 24 qazan. QazAqparat - Elordada ústimizdegi jyldyń 9 aıynda týberkýlezden ólim-jitim kórsetkishi 49,5%, al atalǵan aýrýǵa shaldyǵý oqıǵalary 25% tómendedi. Bul týraly elordanyń resmı saıty habarlady.
Astana qalasynyń týberkýlezge qarsy dıspanserinde 5 ftızıopedıatrııalyq, 8 ftızıatrııalyq ýchaske ashyldy. Sonyń nátıjesinde, týberkýlezdi erte anyqtaý jáne emdeý sharalaryn ýaqytyly qabyldaý maqsatynda barlyq emhanalarda 11 ftızıopedıatr qabyldaý júrgizdi.
Budan basqa, súıek býyn júıesi týberkýlezine shaldyqqandar úshin 20 kereýettik osteohırýrgııalyq bólim ashyldy, onda hırýrgııalyq emdeýdiń ınnovatsııalyq tásilderin qoldana otyryp, 140 ota tabysty ótkizildi. Sonyń ishinde iri býyndar men omyrtqaǵa ota jasaldy. Bul emdelýshilerdiń ómir sapasyn ózgertýge múmkindik berdi. Aıta keteıik, ókpe-terapevtik bólim bazasynda týberkýlezdi der kezinde anyqtaý maqsatynda 10 dıfferentsıaldyq-dıagnostıkalyq kereýet uıymdastyryldy. Al ambýlatorlyq kezeńde týberkýlezge qarsy preparattarmen emdeý terapııasyna arnalǵan 6 kereýettik kúndizgi statsıonar ashyldy. Ortalyqtandyrylǵan dárigerlik-konsýltatıvtik komıssııanyń kúndelikti jumysy kúsheıtildi. Aıta keteıik, týberkýlezdi emdeýdiń basty máseleleriniń biri - ony erte anyqtaý. Ony sheshý úshin az ýaqyttyń ishinde indetti anyqtaýǵa múmkindik beretin zerthanalyq dıagnostıkalaýdyń zamanaýı, jetildirilgen asa sezgish tásilderi engizildi.
