Astanada týberkýlez syrqaty tómendedi
ASTANA. QazAqparat - Astana qalalyq Densaýlyq saqtaý basqarmasynyń málimetinshe, byltyrǵy jyldyń qorytyndysy boıynsha Astana qalasyndaǵy týberkýlezben aýyratyndar sany 100 myń adamnyń 60,8% qurady, oǵan qosa byltyrmen salystyrǵanda aýyrý 18,6% tómendegen, dep habarlady astana.gov.kz.
Ótken jyldyń qyrkúıeginde ótken QR Qaýipsizdik keńesi janyndaǵy Saraptamalyq keńes otyrysynda Qazaqstannyń sanıtarlyq epıdemııalyq jáne veterınarlyq qyzmetteriniń damýyn memlekettik qoldaý jóninde sharalar keshenin qabyldaý tapsyrmasy qoıylǵan bolatyn. Bul sharalar jańa ınfektsııalyq aýrýlardyń taraýyna jol bermeýge baǵyttalýy tıis: Ebola bezgegi, qyzylsha epıdemııasy, týberkýlez, oba jáne t.b. Mundaı aýrýlar halyq densaýlyǵyna qater týǵyzyp, Qazaqstan ekonomıkasynyń turaqtylyǵyn buzady.
Týberkýlez máselelerin zertteıtin ulttyq ortalyq júrgizgen týberkýlezge qarsy qyzmetter jumysynyń ındıkatorlaryn reıtıngtik baǵalaý nátıjeleri boıynsha, Astana qalasy úzdikter qatarynda, 2014 jyldyń 9 aıynyń qorytyndysy boıynsha Qazaqstan Respýblıkasynyń barlyq aımaqtary arasynda 2 orynda.
Halyq turmysynyń sanıtarlyq epıdemııalyq sharttaryn jaqsartýdan bólek, týberkýlezben kúresýdiń eń tıimdi ádisteriniń biri - vaktsına qoıý bolyp tabylady. Ásirese, balalarǵa erekshe kóńil bólý kerek. Týberkýlezge qarsy ekpe bala organızminiń týberkýlez taıaqshalaryna qarsy turýyn kúsheıtip, balany týberkýlezdi menıngıt pen ókpeniń shashyrandy týberkýlezinen qorǵaıdy.
Bala týyla sala aýrýǵa qarsy ımmýnıtet týdyratyn BTsJ ekpesi qoıylady. BTsJ ekpesi bul týberkýlez aýrýyn týdyrmaıtyn, biraq osy aýrý túrine qarsy ımmýnıtet týdyratyn álsiretilgen vaktsınalyq shtamm. Kóp adamdar Mantý reaktsııasyn ekpe dep qatelesedi, alaıda, bul ekpe emes, ımmýnıtettiń týberkýlezge qarsy qysymyn tekserip, aýrýdy erte anyqtaýǵa arnalǵan teriniń allergııalyq synamasy .
Astanada BTsJ vaktsınasy jańa týylǵan sábılerdiń 96%-yna qoıylady. Vaktsınadan bas tartqan 4% vaktsına qoıýdyń mańyzyn túsinbeı, balalaryn aýrý qaterine ushyratady. Osy baǵytta halyqtyń ımmýnoprofılaktıkanyń mańyzy jónindegi habardarlyǵyn arttyrý maqsatynda kólemdi jumys júrgizilýde. Sondaı-aq, qazirgi kezeńde Astanada mektep oqýshylaryna ekpe qoıylýda.
Týberkýlezdi emdeý elimizde tegin júzege asyrylady: Týberkýlezge qarsy dári-dármekpen qamtamasyz etý memleket bıýdjeti esebinen júrgiziledi. Aýrýǵa baılanysty jumysqa qabilettiligin ýaqytsha joǵaltqan azamattardyń jumys orny zańnamamen bekitilgen ýaqytqa deıin saqtalady.
